ՀԱՄԱՍ-ի պատվիրակությունը Մոսկվայում է․ նախատեսված են բանակցություններ

ՌԴ ԱԳՆ-ն այսօր բանակցություններ կվարի ՀԱՄԱՍ շարժման պատվիրակության հետ։ Այս մասին հայտարարել է ՌԴ փոխարտգործնախարար Միխայիլ Բոգդանովը, գրում է EADaily-ն։

Նախօրեին պաղեստինյան Safa գործակալությունը հայտնել էր ՀԱՄԱՍ-ի պատվիրակության կազմը՝ Մուսա Աբու Մարզուկի գլխավորությամբ։ Մոսկովյան հանդիպումներին նախատեսվում է քննարկել Երուսաղեմում տիրող իրավիճակը և Ռուսաստանի և ՀԱՄԱՍ-ի երկկողմ հարաբերությունները։

Safa-ն ընդգծում է, որ ՀԱՄԱՍ-ի պատվիրակության այցը Մոսկվա տեղի է ունենում Ուկրաինայում պատերազմի պատճառով Իսրայելի ղեկավարության՝ Ռուսաստանի նկատմամբ ոչ բարեկամական գործողությունների ֆոնին։

ՀԱՄԱՍ-ի ղեկավարության ներկայացուցիչների վերջին այցը Մոսկվա տեղի էր ունեցել 2021 թվականի դեկտեմբերին։

ՌԴ արտգործնախարար Սերգեյ Լավրովը, հիշեցնենք, ավելի վաղ հայտարարել էր, թե Հիտլերը հրեական արմատներ ուներ։ Ուկրաինա ներխուժելու պատրվակներից մեկը պաշտոնական Մոսկվան ներկայացնում է որպես Ուկրաինայի «դենացիֆիկացիա»։ Լրագրողի հարցին, թե Ռուսաստանն ինչպե՞ս կարող է խոսել «դենացիֆիկացայի» մասին, երբ Ուկրաինայի նախագահ Վլադիմիր Զելենսկին հրեա է, Լավրովը պատասխանել է․ «Երբ նա ասում է` ի՞նչ նացիզմ կարող է լինել, եթե ես հրեա եմ, ապա կարծում եմ` Հիտլերը նույնպես հրեական ծագում ուներ, ուստի դա ոչինչ չի նշանակում։ Իմաստուն հրեա ժողովուրդն ասում է, որ ամենամոլի հակասեմականները, որպես կանոն, հրեաներ են»։

Լավրովի խոսքերը Իսրայելում վրդովմունք են առաջացրել։ Իսրայելը պահանջել է Մոսկվայից ներողություն խնդրել։

Տաթև Ֆռանգյան