16.09.2026 | 20:06
Աշխատակիցներին սպառնում են աշխատանքից ազատել քաղաքական հայացքների պատճառով. «Անկախ դիտորդ»-ը ահազանգում է
ԵՄ-ն չի կարողացել համաձայնության գալ Ռուսաստանից նավթի ներմուծման արգելքի շուրջ
Քաղաքականություն
04.05.2022 | 20:59
ԵՄ երկրների մշտական ներկայացուցիչներն այսօր չեն կարողացել համաձայնության գալ ռուսական նավթի ներկրման էմբարգոյի շուրջ, բանակցությունները կշարունակվեն մայիսի 5-ին։ Այս մասին հայտնում է Reuters գործակալությունը՝ վկայակոչելով սեփական աղբյուրներին, փոխանցում է ՏԱՍՍ-ը։
Աղբյուրի տվյալներով՝ քննարկման ընթացքում ԵՄ անդամ մի շարք երկրներ, մասնավորապես՝ Հունգարիան, Սլովակիան, Չեխիան և Բուլղարիան մտահոգություն են հայտնել ռուսական նավթից հրաժարվելու դեպքում առաջարկվող միջոցառումների վերաբերյալ։ Այսպիսով, նավթային էմբարգոյի շուրջ առաջին քննարկումն ավարտվել է առանց կոնսենսուսի։
Լրատվամիջոցը նաև նշել է, որ եվրոպական երկրները համաձայնության կարող են հասնել հինգշաբթի նախատեսված ԵՄ մշտական ներկայացուցիչների հաջորդ հանդիպմանը։
Հիշեցնենք, որ Եվրահանձնաժողովի նախագահ Ուրսուլա ֆոն դեր Լյայենն այսօր ելույթ էր ունեցել Եվրախորհրդարանում՝ ներկայացնելով Ռուսաստանի դեմ պատժամիջոցների 6-րդ փաթեթը։ Նա նշել էր, որ ԵՄ-ն դիտարկում է նաև ռուսական նավթից աստիճանական նվազման քաղաքականությունը։
Էմմա Չոբանյան
