22.04.2026 | 23:30
ՀՀ տարածքում ավտոճանապարհները հիմնականում անցանելի են
Հունգարիայի վարչապետը Հռոմի պապին ասել է, թե Պուտինն Ուկրաինայում պատերազմն ավարտելու է մայիսի 9-ին․ CNN
Քաղաքականություն
03.05.2022 | 13:55
Հռոմի Ֆրանցիսկոս պապը հայտնել է, որ Հունգարիայի վարչապետ Վիկտոր Օրբանը ապրիլի վերջին իրենց հանդիպման ժամանակ պատմել է, թե ՌԴ նախագահ Վլադիմիր Պուտինը ծրագրում է Ուկրաինա ներխուժումն ավարտել մայիսի 9-ին՝ Հաղթանակի օրը։ Հռոմի պապն այս մասին ասել է իտալական Corriere della Sera թերթի հետ հարցազրույցում, գրում է CNN-ը։
«Երբ ես հանդիպեցի Օրբանին, նա ինձ ասաց, որ ռուսները ծրագրում են ամեն ինչ ավարտել մայիսի 9-ին։ Սա բացատրում է նաև այս օրերի էսկալացիան։ Քանի որ հիմա միայն Դոնբասը չէ, Ղրիմն է, Օդեսան, այն խլում է Ուկրաինայից Սև ծովի նավահանգիստը»,- ասել է Հռոմի պապը։
Ֆրանցիսկոս պապընշել է, որ հոռետես է, բայց պետք է հնարավոր ամեն ինչ անել՝ պատերազմը դադարեցնելու համար։ Նա, միաժամանակ, կրկնել է ավելի վաղ արված հայտարարությունները, թե պատրաստ է մեկնել Մոսկվա՝ հանդիպելու Պուտինի հետ, և Ուկրաինայի պատերազմը համեմատել է Ռուանդայի ցեղասպանության հետ։
«Մենք դեռ պատասխան չենք ստացել և շարունակում ենք պնդել, եթե նույնիսկ ես մտավախություն ունեմ, որ Պուտինը չի կարող և չի ցանկանում այս պահին հանդիպում ունենալ։ Սակայն այսքան դաժանություն․․․ ինչպե՞ս այն կասեցնել: 25 տարի առաջ մենք նույն բանն ապրեցինք Ռուանդայում»,- ասել է Հռոմի պապը։
Նա նաև հայտնել է, որ հիմա Կիև չի մեկնելու, փոխարենն ուղարկել է իր ներկայացուցչին։
«Նախ պետք է գնամ Մոսկվա, առաջինը հանդիպեմ Պուտինին։ Սակայն ես քահանա եմ, ի՞նչ կարող եմ անել։ Կանեմ այն, ինչ կարող եմ, եթե Պուտինը դուռը չբացի»,- ասել է Ֆրանցիսկոս պապը։
Էմմա Չոբանյան
