Դոնբասում ռուսական զորքերը նվազագույն առաջընթաց են գրանցել․ Պենտագոնի ներկայացուցիչ

Ռուսական ուժերը Դոնբասում՝ Ուկրաինայի արևելքում, որտեղ ընթանում են ամենաինտենսիվ մարտերը, տառապում են վատ հրամանատարության և վերահսկման, ցածր մարտական ոգու և ոչ իդեալական նյութատեխնիկական ապահովման պատճառով։ Այս մասին ասել է ԱՄՆ Պաշտպանության նախարարության բարձրաստիճան պաշտոնյան։

«Մենք նախկինի նման դիտարկում ենք ռուսական զորքերի, լավագույն դեպքում, նվազագույն առաջընթաց Դոնբասում»,- ասել է պաշտոնյան։

Նրա խոսքով՝ Ռուսաստանի իշխանություններն աննշան հաջողություններ են գրանցել ուկրաինական Իզյում և Պոպասնայա քաղաքներից դեպի արևելք, սակայն առաջընթացը եղել է «դանդաղ և անհավասար»: Բացի այդ, Պենտագոնի ներկայացուցիչը նշել է, որ ռուսական ուժերը, ըստ երևույթին, վախենում են ռիսկի դիմել և փորձում են խուսափել իրենց զորքերի շարքում զոհերից՝ ինչպես օդային, այնպես էլ ցամաքային մարտերում:

Ուկրաինական ուժերը շարունակում են Խարկովը պահել ռուսական ուժերի ներխուժումից։ Ամերիկացի պաշտոնյայի խոսքով՝ քաղաքը շարունակում է ենթարկվել ՌԴ օդային հարվածներին։

«Սակայն վերջին 24-48 ժամվա ընթացքում ուկրաինացիները լավ աշխատանք են կատարել՝ ռուսներին էլ ավելի հետ մղելով՝ Խարկովից մոտ 40 կիլոմետր դեպի արևելք»,- ասել է ամերիկացի պաշտոնյան։

Ըստ Պենտագոնի՝ ռազմական գործողության մեկնարկից ի վեր Ռուսաստանը 2125 հրթիռ է արձակել Ուկրաինայի ուղղությամբ: ԱՄՆ Պաշտպանության նախարարության ներկայացուցչի խոսքով՝ ուկրաինական ուժերը ցույց են տալիս «կոշտ և ահեղ դիմադրության լավ օրինակ»:

Տաթև Ֆռանգյան