Լեհաստանում միջազգային զորավարժություններ են մեկնարկել

Լեհաստանում մեկնարկել են Defender Europe 2022 և Swift Response միջազգային զորավարժությունները։ Դրանք կանցկացվեն նաև ութ այլ երկրներում ու կտևեն մայիսի 1-ից մայիսի 26-ը։ Այս մասին հայտնում է Լեհաստանի ազգային պաշտպանության նախարարությունը, գրում է korrespondent-ը։

Լեհաստանից բացի՝ զորավարժություններին կմասնակցեն զինվորականներ ԱՄՆ-ից, Ֆրանսիայից, Շվեդիայից, Գերմանիայից, Դանիայից և Մեծ Բրիտանիայից։ Ընդհանուր առմամբ, զորավարժություններին կմասնակցի 18 հազար զինվորական ավելի քան 20 երկրից։ Մասնավորապես, հենց Լեհաստանի տարածքում ներգրավվելու է մոտ 7 հազար զինվորական և 3 հազար միավոր տեխնիկա։

Զորավարժությունների շրջանակում զինտեխնիկան հիմնականում կտեղափոխվի գիշերային ժամերին՝ երթևեկությանը հնարավորինս չխանգարելու համար։ Միևնույն ժամանակ, գերատեսչությունը դիմել է բնակիչներին՝ խնդրելով չտարածել լուսանկարներ և տեսանյութեր զորքերի տեղաշարժի, ինչպես նաև դրանց գտնվելու վայրի, ռազմական ինքնաթիռների թռիչքի և վայրէջքի մասին:

«Defender Europe 22»-ը միջազգային կանոնավոր զորավարժություն է, որը կազմակերպվում է ԱՄՆ զինված ուժերի կողմից՝ ապահովելու ԱՄՆ-ի և ՆԱՏՕ-ի դաշնակիցների ու գործընկերների միջև պատրաստվածությունը և փոխգործակցությունը»,- ասվում է Լեհաստանի պաշտպանության նախարարության հայտարարության մեջ:

Լեհաստանը պարզաբանել է, որ DE22-ը և SR 22-ը փուլային պաշտպանական զորավարժություններ են և ուղղված չեն որևէ երկրի հետ, նաև կապված չեն տարածաշրջանի ներկայիս աշխարհաքաղաքական իրավիճակի հետ:

Տաթև Ֆռանգյան