27.03.2026 | 20:28
Անկարան հայտնում է, որ փորձում են պարզել՝ ով է տվել Իրանից Ադրբեջանի և Թուրքիայի ուղղությամբ հրթիռներ արձակելու հրամանը
ԵԱՀԿ-ն Երևանում «Բանակցային ոստիկանություն» թեմայով դասընթաց է անցկացնում
29.04.2022 | 22:32
ՀՀ ոստիկանությունում բանակցային ոստիկանության մոդելի ներդրման գործընթացի շրջանակներում Ոստիկանության կրթահամալիրում մեկնարկեց «Բանակցային ոստիկանություն» թեմայով երկշաբաթյա վերապատրաստման դասընթացը։
Ոստիկանության տեղեկացմամբ՝ ԵԱՀԿ քարտուղարության կազմակերպած դասընթացը նախատեսված է ՀՀ ոստիկանության Երևան քաղաքի և մարզային վարչությունների համապատասխան ծառայողների համար։
Այն վարում են բանակցային ոստիկանության ոլորտում տասնյակ տարիների աշխատանքային փորձ ունեցող՝ Շվեդիայից ժամանած ԵԱՀԿ փորձագետներ Տանյա Վիկլունդը և Կարլ Յոհան Ահլստրոմը։
Բացման խոսքով հանդես եկան ՀՀ ոստիկանության շտաբի պետ, ոստիկանության գնդապետ Արմեն Մկրտչյանը, ՀՀ ոստիկանության կրթահամալիրի պետ, ոստիկանության գնդապետ Մանուկ Մուրադյանը և ԵԱՀԿ քարտուղարության ներկայացուցիչ Մոնա Նորդբերգը։
Կարևորելով բանակցային ոստիկանության մոդելի ներդրման շարունակականությունն ապահովելու ուղղությամբ տարվող տևական համագործակցությունը՝ պարոն Մկրտչյանը նշեց, որ ՀՀ ոստիկանությունում արդեն իսկ բավական մեծ փորձ կա կուտակված, և բանակցային կարողությունների ու հմտությունների մշտական զարգացումը միտված է անհրաժեշտ գործիքակազմով ապահովել ոստիկաններին՝ հավաքները, զանգվածային անկարգությունները, անվերահսկելի դեպքերը կանխարգելելու և արդյունավետ կառավարելու համար։ Պարոն Մկրտչյանն իր խոսքն ավարտեց՝ դասընթացի մասնակիցներին մաղթելով բարի, արդյունավետ աշխատանքային մթնոլորտ, և հույս հայտնեց, որ ապագայում Շվեդիայի օրինակով Հայաստանում կգործի բանակցային ոստիկանության առանձին ստորաբաժանում։
Շարունակելով պարոն Մկրտչյանի խոսքը՝ Կրթահամալիրի պետ, ոստիկանության գնդապետ Մ․ Մուրադյանը ողջունեց մասնակիցներին և, բարձր գնահատելով դասընթացի նպատակն ու դերը, հաջողություն մաղթեց նրանց և դասընթացավարներին՝ իրենց առաքելությունն իրականացնելու գործում։
