Քաղաքականություն
29.04.2022 | 18:19
Ինդոնեզիայի նախագահ Ջոկո Վիդոդոն պնդում է, որ Ռուսաստանի նախագահ Վլադիմիր Պուտինը նախատեսում է մասնակցել G20-ի գագաթնաժողովին, որը նախանշված է նոյեմբերին Ինդոնեզիայի Բալի կղզում։ Այս մասին հայտնում է CNN Indonesia-ն, փոխանցում է ՏԱՍՍ գործակալությունը։
«Նախագահ Պուտինը երախտագիտություն է հայտնել G20-ի գագաթնաժողովին հրավիրելու համար և ասել, որ կմասնակցի»,- Վիդոդոյի խոսքերն է մեջբերում լրատվամիջոցը։
Նախօրեին տեղի է ունեցել Պուտինի հեռախոսազրույցը Ինդոնեզիայի նախագահ հետ, որի ընթացքում քննարկվել է Ուկրաինայում իրավիճակն ու G20-ի գործունեությունը։
Ավելի վաղ էլ Ինդոնեզիայի ֆինանսների նախարարը հայտարարել է, որ գագաթնաժողովին հրավիրված են G20-ի բոլոր երկրների ղեկավարները, այդ թվում՝ ՌԴ նախագահը։ Ինդոնեզիայի դիրքորոշումը քննադատության է արժանացել մի շարք երկրների, այդ թվում՝ ԱՄՆ-ի, Կանադայի և Ավստրալիայի կողմից:
Պուտինի խոսնակ Դմիտրի Պեսկովն էլ ապրիլի 22-ին հայտարարել էր, որ դեռևս որոշում չի կայացվել G20-ի գագաթնաժողովին մասնակցության վերաբերյալ։
Էմմա Չոբանյան
