Բլինքենը հայտարարել է, որ պետք է արագացնել Թուրքիային սպառազինության վաճառքը

ԱՄՆ պետքարտուղար Էնթոնի Բլինքենը հայտարարել է, որ Թուրքիային զենքի վաճառքը պետք է արագացվի, գրում են թուրքական լրատվամիջոցները։

«Ես կարծում եմ՝ մենք կարող ենք և պետք է ավելի լավ գործենք վաճառքում, հատկապես սայն արագությամբ, որով մենք կարողանում ենք վերանայել իրադրությունը։ Կարծում եմ, որ դա մեր գործն է գործադիր իշխանության մեջ: Դա նաև Կոնգրեսի խնդիրն է»,- ասել է Բլինքենը Պետքարտուղարության բյուջեի լսումների ժամանակ։

Հիշեցնենք, որ Թուրքիայի կողմից ռուսական C-400 համակարգերի ձեռքբերումից հետո ԱՄՆ-ը պատժամիջոցներ է սահմանել թուրքական պաշտպանական արդյունաբերության նկատմամբ և հեռացրել F-35 կործանիչների ծրագրից։ Թուրքիան էլ բազմիցս կոչ է արել Միացյալ Նահանգներին դադարեցնել պատժամիջոցները և հոկտեմբերին դիմել է՝ Lockheed Martin-ից 40 F-16 կործանիչներ և իր ունեցած F-16-ների շուրջ 80 արդիականացման սարքեր գնելու համար:

Բլինքենը մեկնաբանություններ է արել՝ ի պատասխան հարցին, թե ի՞նչ կարող է անել Ջո Բայդենի վարչակազմը՝ Թուրքիայի և Հնդկաստանի նման դաշնակիցներին օգնելու համար։

«Մի շարք երկրներ, ինչպես ես ավելի վաղ ասացի, վերանայում են իրենց հարաբերությունները, այդ թվում՝ Ռուսաստանի հետ, նաև այն երկրները, որոնք երկարամյա պաշտպանական հարաբերություններ են ունեցել Ռուսաստանի հետ։ Եթե մենք կարողանանք նրանց գործընկեր լինել այնպես, ինչպես մի քանի տասնամյակ առաջ չենք եղել, ես կարծում եմ՝ այդ ուղղությամբ պետք է կարողանանք գործել»,- ասել է Բլինքենը։

Սակայն Վաշինգտոնը բախվում է կոնգրեսականների կոշտ հակազդեցությանը ՆԱՏՕ-ի անդամ Թուրքիայի կողմից սպառազինություն ձեռք բերելու հարցում։ Կոնգրեսի անդամները որպես ռազմական աջակցությունը դադարեցնելու պատճառ են նշում Թուրքիայի կողմից ագրեսիան հարևան Հունաստանի նկատմամբ, հարձակումները Միացյալ Նահանգների հետ դաշնակից քուրդ զինյալների վրա, Էրդողանի կառավարման օրոք ավտորիտարիզմը։ Պետքարտուղարությունն էլ Կոնգրեսին պատասխան նամակում նշել է, որ կոծանիչների վաճառքը բխում է ԱՄՆ-ի և ՆԱՏՕ-ի շահերից։

Էմմա Չոբանյան