20.08.2026 | 21:53
ԶՈՒ ԳՇ պետը ստուգայցեր է իրականացրել զորամասերում և բանակային դիրքերում. ԼՈՒՍԱՆԿԱՐՆԵՐ
Ալիևը հայտարարել է, թե ՌԴ-ի հետ դաշնակցային հռչակագիրն արտացոլում է Ադրբեջանի ռազմավարական շահերը
Քաղաքականություն
29.04.2022 | 15:55
Այսօր Բաքվում միջազգային համաժողովի մասնակիցների հետ հանդիպմանը Ադրբեջանի նախագահ Իլհամ Ալիևն անդրադարձել է Բաքվի և Մոսկվայի հարաբերություններին՝ նշելով, որ երկու երկրները համագործակցում են հարցերի լայն շրջանակի շուրջ, և որ 2022թ․ փետրվարին ստորագրված դաշնակցային համագործակցության մասին հռչակագիրը լիովին համապատասխանում է Բաքվի շահերին, գրում են տեղական լրատվամիջոցները։
«Ադրբեջանի և Ռուսաստանի միջև դաշնակցային համագործակցության մասին հռչակագիրն արտացոլում է մեր ռազմավարական շահերը, քանի որ Ռուսաստանը մեր հարևանն է, գործընկերը, որն ակտիվ մասնակցություն է ունեցել Ղարաբաղյան երկրորդ պատերազմի ավարտի գործում, որի խաղաղապահներն այսօր գտնվում են Ղարաբաղում։ Կան այլ հարցեր ևս, որոնց շուրջ մենք համագործակցում ենք արդեն շատ տարիներ՝ տնտեսական, էներգետիկ, տրանսպորտային, հումանիտար, մշակութային և այլն»,- ասել է Ալիևը։
Նա նաև ընդգծել է, որ Բաքուն համագործակցում է Ռուսաստանի հետ նաև ռազմական ոլորտում, մասնավորապես, սպառազինություն ու զինտեխնիկա գնում է։
«Բացի այդ, մենք Ռուսաստանից գնում ենք շատ զինտեխնիկա, իհարկե, շուկայական գներով՝ ի տարբերություն Հայաստանի, որն այդ զենքերն «անվճար է» ստացել»,- հայտարարել է Ադրբեջանի նախագահը։
Նա նաև խոսել է Թուրքիայի հետ կնքված «Շուշիի հռչակագրի» մասին՝ նշելով, որ այն երկու երկրների և ժողովուրդների միջև եղբայրության և համագործակցության վառ օրինակ է։
«Այդ փաստաթղթով մենք ձևակերպեցինք մեր համագործակցությունը բոլոր ձևաչափերում։ Ստորագրելով «Շուշիի հռչակագիրը»՝ մենք հայտարարեցիքն ամբողջ աշխարհին Թուրքիայի հետ մեր միասնության մասին, ինչպես խոսքով, այնպես էլ գործով»,- ասել է Ալիևը՝ հավելելով, որ Թուրքիան և Ադրբեջանը դաշնակիցներ են բոլոր ուղղություններում, այդ թվում՝ ռազմական և ռազմարդյունաբերության ոլորտում։
Էմմա Չոբանյան
