29.07.2026 | 00:56
«Արարատ-Արմենիան» դուրս եկավ Չեմպիոնների լիգայի որակավորման երրորդ փուլ. ՏԵՍԱՆՅՈՒԹ
ԵԱՀԿ-ն հայտարարել է Ուկրաինայում առաքելության փակման մասին
Քաղաքականություն
29.04.2022 | 14:02
Եվրոպայում անվտանգության և համագործակցության կազմակերպությունը (ԵԱՀԿ) ձեռնամուխ է լինում Ուկրաինայում հատուկ դիտորդական առաքելության փակմանը։ Այս մասին ասվում է կազմակերպության կայքում հրապարակված հայտարարությունում։ Որոշման մասին հայտարարել են ԵԱՀԿ գործող նախագահ, Լեհաստանի արտգործնախարար Զբիգնև Ռաուն և կազմակերպության գլխավոր քարտուղար Հելգա Մարիա Շմիդտը։
«Սա դյուրին որոշում չէ: Մենք մասնակից պետությունների հետ քաղաքական երկխոսության միջոցով ուսումնասիրել ենք բոլոր հնարավոր տարբերակները, որպեսզի հասնենք հատուկ դիտորդական առաքելության մանդատի երկարացմանը, սակայն Ռուսաստանի Դաշնության դիրքորոշումը մեզ այլ ելք չթողեց, քան քայլեր ձեռնարկել առաքելությունը փակելու համար»,- որոշումն այսպես է մեկնաբանել լեհ նախարարը։
Միաժամանակ, Ռաուն նշել է, որ ԵԱՀԿ-ն կձգտի շարունակել իր գործունեությունը երկրում՝ համաձայն մանդատով ստանձնած պարտավորությունների։
Իր հերթին, Շմիդտն ընդգծել է, որ առաքելությունը վերջին ութ տարիների ընթացքում կենսական դեր է խաղացել Ուկրաինայում և ընդգծել է, որ ԵԱՀԿ-ն ամեն ինչ կանի առաքելության անդամներին ռուսական գերությունից ազատելու համար։
Ավելի վաղ Ուկրաինայի պաշտպանության նախարար Ալեքսեյ Ռեզնիկովը հայտարարել էր, որ անվտանգության ներկայիս միջազգային կառույցներն անզոր են կանխելու Ռուսաստանի պատերազմն Ուկրաինայի դեմ։ Այս առումով ՄԱԿ-ին և ԵԱՀԿ-ին պետք է փոխարինեն ավելի արդյունավետ կազմակերպություններ։
Հիշեցնենք, որ ավելի վաղ տեղեկություններ էին տարածվել, որ ռուսական ուժերը Լուգանսկում և Դոնեցկում գերի են վերցրել ԵԱՀԿ դիտորդական առաքելության մի շարք անդամների։ Հաղորդվում է նաև առաքելության անձնակազմին ուղղված սպառնալիքների մասին:
Տաթև Ֆռանգյան
