26.11.2024 | 18:15
Հարկերից խուսափե՞լ․ չէ, չենք լսել․ ինչու են դատավորներն ապրում կիսակառույց առանձնատներում
Էրդողանն իրավապաշտպան Քավալայի ցմահ ազատազրկումն օրինական է համարում
Քաղաքականություն
28.04.2022 | 22:21
Թուրքիայի նախագահ Ռեջեփ Թայիփ Էրդողանը, որը նաև երկրի իշխող «Արդարություն և զարգացում» կուսակցության ղեկավարն է, օրինական է համարել Գեզի այգու գործով ցմահ ազատազրկման դատապարտված իրավապաշտպան Օսման Քավալայի ցմահ ազատազրկումը, հայտնում են թուրքական լրատվամիջոցները։
Հիշեցնենք, որ երկուշաբթի դատարանը Քավալային ցմահ ազատազրկման դատապարտեց 2013 թվականին համազգային հակակառավարական ցույցերը «կազմակերպելու և ֆինանսավորելու» համար, ևս 18 տարվա ազատազրկման դատապարտվեցին յոթ այլ մեղադրյալների՝ նրան «օգնելու» համար։
«Ժողովրդավարության համար մեծ հաջողություն է, որ մեր անկախ և անաչառ դատարանները, որոնք որոշում են ազգի անունից, դատեցին պուտչիստներին և նրանց արժանացրին արժանի պատժի։ Ես անկեղծորեն շնորհակալություն եմ հայտնում, Աստված օրհնի նրանց»,- ասել է Էրդողանը։
Նա նաև նշել է, որ Թուրքիան օրենքի երկիր է, դատական համակարգ էլ որոշումներ է կայացնում՝ համաձայն նրա, ինչին հավատում է, և գիտի՝ օրենքը գերակա է։
Էրդողանը հայտարարել է, թե թուրքական դատական իշխանությունն ապացուցել է իր անկախությունը՝ չտրվելով Թուրքիայից դուրս գտնվող խմբերի և նրանց խոսնակների «շանտաժին»:
Հավելենք, որ ԱՄՆ-ն, Գերմանիան, Ֆրանսիան, ԵՄ-ն և մի շարք այլ երկրներ ու կառույցներ դատապարտել են թուրքական դատարանի այս որոշումն ու կոչ արել ազատ արձակել Օսման Քավալային։
«Որոշ խմբերի կեղտոտ լեզուն, որից սպառնալիքի հոտ է գալիս, չի կարող ստվերել այս պատմական որոշման կարևորությունը մեր երկրի և Թուրքիայի ապագայի համար»,- ասել է Էրդողանը։
Հիշեցնենք, որ 2019 թվականին ՄԻԵԴ-ը վճռել էր ազատ արձակել Քավալային՝ ապացույցների բացակայության պատճառով։
Էմմա Չոբանյան
