26.11.2024 | 18:51
Քննությունը նորմալ գնում է, չի կարելի եղածը ուրիշ հողի վրա ներկայացնել․ Հակոբ Ասլանյան. ՏԵՍԱՆՅՈՒԹ
Թուրքական «Բայրաքթար»-ով Ուկրաինան ռմբակոծել է ՌԴ-ի խորքում գտնվող նավթապահեստները, նաև խորտակել «Մոսկվա» հածանավը․ Middle East Eye
Քաղաքականություն
28.04.2022 | 21:08
Թուրքիայի կողմից մատակարարված «Բայրաքթար» անօդաչու թռչող սարքը ենթադրվում է, որ օգտագործվել է Ուկրաինայի կողմից երկուշաբթի Ռուսաստանի տարածքում գտնվող երկու նավթապահեստներին հարվածելու համար։ Միջադեպին ծանոթ աղբյուրը Middle East Eye-ին պատմել է, որ Թուրքիայի արտադրած BayraktarTB2-ն օգտագործվել է Մոսկվայից 370 կմ հարավ գտնվող Բրյանսկի ուղղությամբ հարձակման ժամանակ։
Այս վերջին հարձակումն ավելի նշանակալից է, քանի որ հաջողվեց անցնել Ռուսաստանի հակաօդային պաշտպանությունը և թռչել Ռուսաստանի տարածք առնվազն 150 կմ խորությամբ:
Ռուսական պետական լրատվամիջոցները հայտնում էին, որ հրդեհը բռնկվել է Բրյանսկի նավթի պահեստում, որը 10,000 տոննա վառելիք է պաշարում։ Հաղորդվում էր նաև 5000 տոննա պարունակող ռազմական վառելիքի պահեստում երկրորդ հրդեհի մասին: Այս քաղաքը համարվում է ռուսական լոգիստիկ բազան Ուկրաինայում գործողությունների համար։
Սթիյն Միտցերը, որը սպառազինությունների փորձագետ է և ղեկավարում է հայտնի պաշտպանական Oryx բլոգը, MEE-ին ասել է, որ հարձակման ժամանակ Bayraktar TB2-ի օգտագործումը հավանական է՝ չնայած ուկրաինացիների կողմից կադրերի բացակայությանը:
«Պատճառը, որ դուք չեք տեսնում կադրեր, այն է, որ Ռուսաստանը դեռ հրթիռներ է արձակում այն բազաների ուղղությամբ, որտեղից գործում են TB2-ները։ Եթե նրանք կադրեր տեղադրեն, ապա Ռուսաստանը ճնշում կզգա՝ ավելի ուժեղ հակահարված հասցնելու»,- ասել է Միտցերը։
Ուկրաինական հարձակմանը ծանոթ աղբյուրը նաև լրատվամիջոցին հաստատել է, որ Bayraktar-ն իր դերն է խաղացել ապրիլի 14-ին Ռուսաստանի Սևծովյան նավատորմի դրոշակակիր «Մոսկվա» հածանավի խորտակման գործում:
«Ուկրաինական «Նեպտուն» հականավային հրթիռը որոշակի ուղղորդման խնդիրներ ունի: TB2 Bayraktar-ը դա պետք է լուծեր նավը մատնանշելով»,- ասել է աղբյուրը։
Ուկրաինան և Թուրքիան սերտ պաշտպանական համագործակցություն ունեն։ «Բայրաքթար»-ներ արտադրող «Բայքար» ընկերության տեխնիկական գծով տնօրեն Սելջուկ Բայրաքթարը Թուրքիայի նախագահ Ռեջեփ Թայիփ Էրդողանի փեսան է, պատերազմից առաջ նաև գործարան էր կառուցում Ուկրաինայում։ Ուկրաինական ընկերություններն էլ արտադրում են TB2-ի շարժիչները, և Թուրքիան վերջին երկու տարվա ընթացքում Կիևին վաճառել է ավելի քան 20 «Բայրաքթար»: Վերջին երկու ամիսների ընթացքում Թուրքիայի և Լեհաստանի միջև հաճախակի թռիչքներն էլ ցույց են տալիս, որ Թուրքիան շարունակել է Կիևին մատակարարել «Բայրաքթար»-ներ։ Որոշ փորձագետներ կարծում են, որ ևս 6 կամ 12 անօդաչուներ են մատակարարվել, ինչպես պայմանավորվել էին մինչ պատերազմը:
Էմմա Չոբանյան
