Պուտինը շնորհակալություն է հայտնել Էրդողանին «ՌԴ-ի և ԱՄՆ-ի միջև փոխանակումը կազմակերպելու համար»

Թուրքիայի նախագահ Ռեջեփ Թայիփ Էրդողանն ու ՌԴ նախագահ Վլադիմիր Պուտինն այսօր հեռախոսազրույց են ունեցել։ Նրանք քննարկել են Ռուսաստանի և ԱՄՆ-ի միջև նախօրեին Թուրքիայի տարածքում տեղի ունեցած փոխանակումը, գրում է «Անադոլու» գործակալությունը։

Թուրքիայի նախագահի աշխատակազմի հասարակայնության հետ կապերի բաժինը հայտնում է, որ Պուտինը շնորհակալություն է հայտնել իր թուրք գործընկերոջը ամերիկացի Թրևոր Ռիդի հետ ռուս օդաչու Կոնստանտին Յարոշենկոյի փոխանակումը կազմակերպելու համար, որը տեղի է ունեցել Թուրքիայի ազգային հետախուզական կազմակերպության համակարգման և վերահսկողության ներքո։

Էրդողանն էլ նշել է, որ Թուրքիայի մասնակցությունը գործընթացում այն կարևորության ևս մեկ ցուցանիշն է, որն Անկարան տալիս է խաղաղությանը, երկխոսությանը և համագործակցությանը, ինչպես նաև միջնորդական ջանքերի պատրաստակամությանը։ Թուրքիայի նախագահը նաև նշել է երկու երկրների հատուկ ծառայությունների սերտ շփումների և համակարգված գործողությունների պահպանման անհրաժեշտությունը, ինչն «օգնում է կանխել հումանիտար ողբերգությունները և ստեղծել կայունության մթնոլորտ տարածաշրջանում»։

Ըստ Էրդողանի՝ Անկարան պատրաստ է նախաձեռնություն ցուցաբերել ՌԴ-ի և Ուկրաինայի միջև պատերազմի դադարեցման հարցում ու շարունակել  միջնորդությունը՝ հանուն սևծովյան տարածաշրջանում խաղաղության։ Նա նաև հույս է հայտնել, որ Ստամբուլում Կիևի և Մոսկվայի միջև բանակցային գործընթացի դրական ազդակը, ի վերջո, կհանգեցնի տարածաշրջանում երկարաժամկետ խաղաղության։

Էրդողանը վստահեցրել է, որ Անկարան շարունակելու է որոշիչ ու անկեղծ քայլերը ճգնաժամի հաղթահարման ու երկու հարևան պետությունների միջև խաղաղության վերականգնման ուղղությամբ։

Էմմա Չոբանյան