16.09.2026 | 20:06
Աշխատակիցներին սպառնում են աշխատանքից ազատել քաղաքական հայացքների պատճառով. «Անկախ դիտորդ»-ը ահազանգում է
Ուկրաինայում պատերազմի մեկնարկից ի վեր Բրիտանիան մոտ 2 մլն բարել նավթ է ներկրել Ռուսաստանից․ Greenpeace
Քաղաքականություն
27.04.2022 | 18:21
Մեծ Բրիտանիան մոտ 2 մլն բարել ռուսական նավթ է ներկրել Ռուսաստանի կողմից Ուկրաինա ներխուժումից ի վեր։ Այս մասին տվյալներ է հրապարակել Greenpeace-ը, գրում է CNN-ը։
Նշվում է, որ 276 մլն դոլար ընդհանուր արժեքով 1,9 մլն բարել նավթ է փոխադրվել Մեծ Բրիտանիա՝ չնայած ռուսական բիզնեսի դեմ սահմանված մի շարք միջազգային պատժամիջոցներին։
«Ընդհանուր 8 լցանավ ռուսական նավթը Մեծ Բրիտանիա է փոխադրել՝ փետրվարի 24-ին Ուկրաինա Ռուսաստանի ներխուժումից ի վեր, շաբաթական՝ միջինը մեկը»,- ասվում է կազմակերպության հայտարարության մեջ։
Բրիտանիայի կառավարությունը Ռուսաստանին պատկանող, նրա կողմից շահագործվող կամ ռուսական դրոշով նավերի՝ Մեծ Բրիտանիա մուտքի արգելք է սահմանել: Այնուամենայնիվ, ռուսական վառելիքը դեռևս ի վիճակի է Բրիտանիա հասնել այլ երկրների պատկանող լցանավերով:
«Մեծ Բրիտանիայի կառավարությանն օտար չէ կեղծավորությունը, սակայն խոստանալ «անսասան աջակցություն» Ուկրաինային, մինչ ռուսական նավթի գրեթե 2 միլիոն բարել է առաքվում, բացարձակապես անազնիվ է՝ նույնիսկ Բորիս Ջոնսոնի չափանիշներով»,- ասել է Բրիտանիայի Greenpeace նավթագազային քարոզարշավի կազմակերպիչ Ջորջիա Ուայթաքերը։
Դաունինգ Սթրիթն էլ հայտարարել է, որ աստիճանաբար կդադարեցնի ռուսական նավթի ներկրումը, բայց միայն մինչև տարեվերջ:
«Մինչև տարեվերջ մենք աստիճանաբար կդադարեցնենք ռուսական նավթի, իսկ դրանից հետո հնարավորինս շուտ՝ ռուսական հեղուկ բնական գազի ներմուծումը։ Բրիտանիան գազի կամ նավթի մատակարարման խնդիր չունի, ի տարբերություն Եվրոպայի՝ մենք կախված չենք ռուսական էներգակիրների ներմուծումից»,- ասել է կառավարության խոսնակը։
Էմմա Չոբանյան
