«Մենք նավթ, գազ չենք ունենալու, Աստծո տված շնորհքը պիտի օգտագործենք»․ ՀՀ նախագահը Գյումրիում էր․ ՏԵՍԱՆՅՈՒԹ

Այսօր Գյումրիում էր ՀՀ նախագահ Վահագն Խաչատուրյանը։ Նա այցելեց Պետական տնտեսագիտական համալսարանի Գյումրու մասնաճյուղ, մասնակցեց նորաբաց մի քանի լսարանների  բացման արարողությանը, մասնավարապես եղավ Հեռավար կրթության լսարանում, Ընդհանուր տնտեսագիտության և բնագիտական առարկաների ամբիոնում, Ստեղծարարության և նորարարական կենտրոնում։

Հիշեցնենք, որ նախագահը ՀՀ պետական տնտեսագիտական համալսարանի կառավարման խորհրդի նախագահն է։

Նախագահը կարճ ելույթ ունեցով, կիսվեց իր տպավորություններով։

Նա ասաց, որ երբ տարիներ առաջ դասախոսություն է կարդացել Գյումրիում, նկատել է, որ գյումրեցի ուսանողները տարբերվում են, նրանց համար դասախոսություն կարդալիս՝ ավելի պատասխանատու պիտի լինես, քանի որ նրանք ոչ թե սոսկ լսում են, այլ փորձում են հասկանալ, ընկալել։

Նախագահը կարևորեց կրթության դերը հայրենիքի զարգացման գործընթացում։

«Մենք երկրի զարգացման այլ  ճանապարհ չունենք, բացի կրթություն ստանալուց և գիտություն զարգացնելուց, այլընտրանք չունենք։ Ինչքան տարբեր ճանապարհներով փորձեցինք մեր զարգացման տարբեր ուղղություններ ընտրել, Ի վերջո, սա մնաց միակ հնարավորությունը, որ մենք ունենք։ Որպես ժողովուրդ, որպես  ազգ, որպես պետություն, միակ հնարավորությունը սա է։

Մենք նավթ չենք ունենալու, մենք գազ չենք ունենալու, մենք պետք է կարողանանք Աստծո տված շնորհքը՝ կրթվել և գիտության մեջ ներդրում ունենալ, մեր նախաձեռնությամբ հանդես գալ, պետք է օգտագործենք»,- ասաց նախագահը։

Նա նշեց, որ կանեն այն ամենը, ինչ կախված է պետությունից։

Արմիկ Մովսիսյան