23.04.2026 | 16:19
Մեծ ակնկալիքներ ունենք աշխարհի գավաթից․ Հայաստանի Կիոկուշին կարատեի ֆեդերացիայի նախագահ
Պայթյուններ Մերձդնեստրում. Ուկրաինայում պատերազմը սպառնում է վերաճել վտանգավոր փուլի. The Guardian
Քաղաքականություն
27.04.2022 | 16:43
Ուկրաինայում ռուսական պատերազմը սպառնում է վերաճել վտանգավոր նոր փուլի. Մոլդովայում առեղծվածային պայթյունների շարքը բարձրացրել է Ուկրաինայում Ռուսաստանի սանձազերծած պատերազմը նոր տարածք տեղափոխելու վտանգը՝ անկանխատեսելի հետևանքներով: Այս մասին գրում է The Guardian-ը։
Աճում են մտավախությունները, որ Մոլդովայի մեկուսացված Մերձդնեստրի շրջանը կներքաշվի Ուկրաինայի պատերազմի մեջ։ Ռուսաստանի ներխուժումը Մերձդնեստր անմիջական վտանգ կստեղծի Մոլդովայի՝ 2,6 միլիոն բնակչություն ունեցող երկրի ինքնիշխանության համար, որն աճող հետաքրքրություն է ցուցաբերում ՆԱՏՕ-ին անդամակցելու հարցում: Այն նաև սպառնում է Օդեսային՝ ուկրաինական նավահանգստային քաղաքին, որը գտնվում է Սև ծովի ափին՝ Մոլդովայի և Ռուսաստանի կողմից օկուպացված Խերսոնի միջև:
Քանի որ Ուկրաինայում պատերազմը զարգանում է, հակամարտող կողմերը վերաիմաստավորում են իրենց նպատակները։ Այժմ Ռուսաստանը ձգտում է գրավել տարածքներ մինչև Մերձդնեստր, որը Պուտինը կարող է ներկայացնել որպես «Նովոռոսիա»՝ ռուսական նոր կայսրության համար հիմք ստեղծելով։
«Այս նոր փուլի մեկնարկով առանձնանում է անվտանգության գոտին, որը մինչ այժմ զսպում էր ՆԱՏՕ-ին և Ռուսաստանին անմիջական թշնամական շփումից սառը պատերազմից առաջ և հետո։ Եվ եթե Մերձդնեստրում պայթյունները պուտինյան նոր գամբիտի նշաններ են, Մոլդովան կարող է դառնալ հաջորդ ռազմադաշտը, որտեղ այս վտանգավոր նոր աշխարհն ի հայտ է գալիս»,- գրում են վերլուծաբանները։
Ուկրաինական հետախուզության տվյալներով՝ ապրիլի 25-ին Ռուսաստանի Դաշնության հատուկ ծառայությունները սադրանք են կազմակերպել չճանաչված Մերձդնեստրի Մոլդովական Հանրապետության մայրաքաղաքում, որտեղ մի շարք պայթյուններ են որոտացել։
Մոլդովայի նախագահ Մայա Սանդուն հայտարարել է, որ Մերձդնեստրում տեղի ունեցած պայթյունները և էսկալացիայի փորձերը կապված են չճանաչված տարածաշրջանի ներսում գտնվող ուժերի հետ։ Նա ընդգծել է, որ Քիշնևը չի պլանավորում շրջափակել Մերձդնեստրը։
Տաթև Ֆռանգյան
