Ավստրիան համաձայնել է ռուսական գազի դիմաց վճարել ռուբլով․ Գերմանիայում քննարկվում է նման հնարավորությունը

Ավստրիան և ավստրիական OMV նավթագազային ընկերությունն ընդունել են ռուսական գազի դիմաց ռուբլով վճարման պայմանները, հայտարարել է Ավստրիայի կանցլեր Կարլ Նեհամերը։ Նա ասել է, որ ՌԴ նախագահ Վլադիմիր Պուտինը երաշխավորել է մատակարարումների անվտանգությունը։ Ավելի վաղ Սերբիան և Հունգարիան նույնպես ընդունել էին ռուսական գազի դիմաց վճարման այդ պայմանը, գրում է BBC-ի ռուսական ծառայությունը։

Միաժամանակ, Գերմանիայում քննարկվում է գազի դիմաց ռուբլով վճարելու հնարավորությունը։ Գերմանական Uniper էներգետիկ կոնցեռնը հայտնել է, որ իրենք հնարավոր են համարում այդ տարբերակը և այն քննարկում են գերմանական իշխանությունների հետ։ Նշվում է, որ ընկերությունը հաջորդ վճարումը պետք է կատարի մայիսի վերջին։

Առավոտյան «Գազպրոմը» հայտարարել է Բուլղարիա և Լեհաստան գազի մատակարարումը դադարեցնելու մասին, որոնք հրաժարվել են վճարել ռուբլով։ Ընկերությունը նաև ընդգծել է՝ քանի որ երկու երկրներն էլ տարանցիկ պետություններ են, «երրորդ երկրներ տարանցման ծավալներից չթույլատրված քանակով գազի դուրսբերման դեպքում տարանցիկ մատակարարումները կկրճատվեն այդ ծավալով»։

Չորեքշաբթի առավոտյան եվրոպական գազային օպերատորների տվյալները ցույց են տվել, որ Ռուսաստանից Լեհաստան գազի մատակարարումները կարճատև ընդհատումից հետո վերսկսվել են։

Ռազմավարական էներգետիկ ենթակառուցվածքների հարցերով Լեհաստանի կառավարության ներկայացուցիչ Պյոտր Նաիմսկին հայտարարել է, որ Վարշավան այլևս մտադիր չէ գազ գնել Ռուսաստանից։

Բուլղարիայի էներգետիկայի նախարար Ալեքսանդր Նիկոլովն էլ հայտարարել է, որ «բուլղարական գազի պահեստները ռուսական մատակարարումների չեղարկումից հետո կարող են ապահովել ներքին սպառողների պահանջը» մեկ ամսով։ Նա նաև ընդգծել է, որ Բուլղարիան ամբողջությամբ վճարել է ապրիլյան գազի մատակարարումների համար, և «Գազպրոմին» մեղադրել է պայմանագիրը խախտելու մեջ։

«Այս պահին բնական գազն օգտագործվում է որպես քաղաքական և տնտեսական զենք պատերազմում»,- ասել է նա։

Տաթև Ֆռանգյան