15.01.2025 | 13:40
Ստամբուլում մեկ օրում կեղծ ալկոհոլից 11 մարդ է մահացել
ԵԽԽՎ նախագահը ցնցված է Քավալայի ցմահ ազատազրկմամբ և Թուրքիային կոչ է արել անհապաղ ազատ արձակել նրան
Քաղաքականություն
26.04.2022 | 19:21
Եվրոպայի խորհրդի խորհրդարանական վեհաժողովի (ԵԽԽՎ) նախագահ Թինի Քոքսն անդրադարձել է թուրքական դատարանի կողմից իրավապաշտպան և բարերար Օսման Քավալայի ցմահ ազատազրկման վճռին, տեղեկանում ենք ԵԽԽՎ պաշտոնական կայքից։
«Ես խորապես հիասթափված եմ Ստամբուլի դատարանի կողմից նախօրեին Օսման Քավալային ցմահ ազատազրկման դատապարտելու վճռից։ Փաստը, որը նա 5 տարի անցկացրել է նախնական կալանքի տակ, իսկ այժմ ցմահ ազատազրկման է դատապարտվել, որը համարվում է Մարդու իրավունքների եվրոպական կոնվենցիայի խախտում, ցնցող է։ Հիշեցնեմ, որ Օսման Քավալայի գործով Ստրասբուրգի դատարանի վճիռը չկատարելը դրդեց Եվրոպայի խորհրդի Նախարարների կոմիտեին գործն ուղարկել Մարդու իրավունքների եվրոպական դատարան՝ համաձայն Կոնվենցիայի 46.4-րդ հոդվածի։ Հույս ունեմ, որ թուրքական դատական համակարգը կգործի Մարդու իրավունքների եվրոպական կոնվենցիայի չափանիշներին և Կոնվենցիայով Թուրքիայի ստանձնած միջազգային պարտավորություններին համապատասխան։ Պարոն Քավալան պետք է անհապաղ ազատ արձակվի»,- ասվում է ԵԽԽՎ նախագահի հայտարարության մեջ։
Նա, միաժամանակ, կոչ է արել Թուրքիայի իշխանություններին Եվրոպայի խորհրդի, այդ թվում՝ Վեհաժողովի մոնիթորինգի հանձնաժողովի համազեկուցողների հետ կառուցողական և բաց համագործակցության միջոցով լուծել ժողովրդավարական ինստիտուտների գործունեության հետ կապված բազմաթիվ մտահոգությունները, Թուրքիայում հիմնարար իրավունքների և ազատությունների, օրենքի գերակայության հարգանքը, որը, ի թիվս այլոց, ընդգծված է Ստրասբուրգի դատարանի վճիռներում և Վեհաժողովի բանաձևերում՝ Թուրքիայի նկատմամբ իր մոնիթորինգի շրջանակում։
Հավելենք, որ 2019 թվականի դեկտեմբերի 10-ին ՄԻԵԴ-ը որոշել էր, որ Քավալայի ձերբակալությունը և նախնական կալանքը տեղի են ունեցել ապացույցների բացակայության պայմաններում։
Հիշեցնենք, որ ԱՄՆ Պետքարտուղարությունը ևս դատապարտել է դատարանի որոշումը և կոչ արել Թուրքիային՝ ազատ արձակել Քավալային։
Էմմա Չոբանյան
