09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
ԵՄ-ում միասնություն չկա Ռուսաստանից նավթի և գազի էմբարգոյի հարցում
Քաղաքականություն
25.04.2022 | 17:19
Եվրահանձնաժողովը (ԵՀ) ներկայում բավարար աջակցություն չի տեսնում ԵՄ երկրների կողմից Ռուսաստանից նավթի և գազի մատակարարումների ամբողջական էմբարգոյի համար։ Դա վերաբերում է նաև այլընտրանքային պատժամիջոցներին, ինչպիսիք են, օրինակ, Ռուսաստանի Դաշնությունից նավթի և գազի մատակարարումների համար պատժիչ մաքսատուրքերի սահմանումը։ Այս մասին ասել է ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը Die Welt պարբերականին տված հարցազրույցում, փոխանցում է DW-ի ռուսական ծառայությունը։
Բորելը նշել է, որ Ռուսաստանի դեմ նման միջոցները կարևոր են, որպեսզի ուժեղացնեն ճնշումը ՌԴ նախագահ Վլադիմիր Պուտինի վրա և ստիպեն նրան նստել բանակցությունների սեղանի շուրջ։
«Սակայն այս պահին Եվրամիությունում միասնական դիրքորոշում չկա այս հարցում»,- հայտարարել է նա՝ հավելելով, որ այս թեման կրկին կքննարկվի մայիսի 30-31-ը կայանալիք ԵՄ գագաթնաժողովում։
Ներկայում Եվրահանձնաժողովը մշակում է Ռուսաստանի դեմ պատժամիջոցների վեցերորդ փաթեթը, որը փետրվարի վերջից ռազմական գործողություններ է իրականացնում Ուկրաինայի դեմ։
Բորելի խոսքով՝ ԵՄ որոշ երկրներ հասկացրել են, որ դեմ են Ռուսաստանից նավթի և գազի մատակարարումների էմբարգոյին կամ պատժիչ տուրքերին: Միաժամանակ, եվրոպական դիվանագիտության ղեկավարը նշել է, որ ԵՄ բոլոր երկրները ներկայում աշխատում են ռուսական էներգակիրներից կախվածությունը նվազեցնելու ուղղությամբ։
Տաթև Ֆռանգյան
