26.11.2024 | 19:22
Ստեփանծմինդա-Լարս ավտոճանապարհը փակ է
ԱՄՆ-ը Կիևին ռազմական օգնության նոր փաթեթ է խոստացել
Քաղաքականություն
25.04.2022 | 16:20
ԱՄՆ պետքարտուղար Էնթոնի Բլինքենը և Պենտագոնի ղեկավար Լլոյդ Օսթինը Կիև կատարած այցի ժամանակ հայտարարել են, որ ամերիկացի դիվանագետներն աստիճանաբար կվերադառնան Ուկրաինա՝ աշխատելու, նաև Կիևին խոստացել են ռազմական օգնության նոր փաթեթ տրամադրել, գրում է DW-ի ռուսական ծառայությունը։
Այս շաբաթվանից ԱՄՆ դիվանագետները մեկօրյա ուղևորություններ կկատարեն Ուկրաինա, լրագրողներին ասել է Պետքարտուղարության բարձրաստիճան պաշտոնյան սահմանի լեհական կողմում Բլինքենին և Օսթինին սպասելիս:
Անվտանգության նկատառումներից ելնելով՝ ապրիլի 24-ին ամերիկացի երկու նախարարների այցը Կիև հաստատվել է միայն այն բանից հետո, երբ նրանք լքել են Ուկրաինան։ Օսթինը և Բլինքենը վերահաստատել են իրենց աջակցությունն Ուկրաինային և հայտարարել, որ ԱՄՆ նախագահ Ջո Բայդենը մոտ օրերս Կիևում նոր դեսպան կնշանակի Սլովակիայում ԱՄՆ դիվանագիտական առաքելության ներկայիս ղեկավար Բրիջիթ Բրինքին։
Ուկրաինայում ԱՄՆ դեսպանի պաշտոնը թափուր է 2019 թվականից։
Պետքարտուղարության ներկայացուցչի խոսքով՝ ամերիկացի դիվանագետներն «աստիճանաբար վերակտիվացնում են ամերիկյան ներկայությունը Կիևում»։ ՌԴ ռազմական գործողությունների ֆոնին Ուկրաինայում ԱՄՆ դեսպանատան աշխատակիցները տարհանվել են Լեհաստան և այժմ աշխատում են այդ երկրի տարածքից։
Տաթև Ֆռանգյան
