29.06.2026 | 10:35
Փրկարարները Փամբակ գետում հայտնաբերել են հունիսի 27-ից որոնվող տղամարդու դին
Անդրկովկասի վերաբերյալ Ժնևյան քննարկումներն անորոշ ժամանակով հետաձգվել են․ սա կարող է հանգեցնել տարածաշրջանում անորոշության․ ՌԴ ԱԳՆ
Քաղաքականություն
25.04.2022 | 13:25
ՌԴ Արտաքին գործերի նախարարության ԱՊՀ երկրների չորրորդ վարչության տնօրեն Դենիս Գոնչարը հայտնել է, որ Անդրկովկասի վերաբերյալ Ժնևյան քննարկումները, որոնց նոր փուլը պետք է անցկացվեր մարտին, հետաձգվել է, գրում է «Գազետան»։
«Ժնևյան ձևաչափի աշխատանքները հետաձգվել են։ Սա մեր ընտրությունը չէ, նախաձեռնությունն այս դեպքում պատկանում է եռանախագահների (ՄԱԿ, ԵՄ և ԵԱՀԿ) «եռյակին», որոնք իրենց որոշմամբ անորոշ ժամանակով հետաձգել են մարտի վերջին նախատեսված հանդիպման հերթական՝ 56-րդ փուլը»,- ասել է Գոնչարը։
Նրա խոսքով՝ «քննարկումների այս մասնակիցներն իրականում «պատանդ են վերցրել» բանակցային ամենակարևոր ձևաչափը, որի շնորհիվ հնարավոր է եղել պահպանել տարածաշրջանում անվտանգության և կայունության ընդունելի մակարդակ»։
Ըստ Գոնչարովի՝ «արևմտյան գործընկերների ոչ բարեկամական և քաղաքականացված քայլերը չեն օգնում Հարավային Կովկասում կայունության և անվտանգության ամրապնդման գործին» և կարող են «հանգեցնել անորոշության այս տարածաշրջանում»։
Ավելի վաղ հայտնի էր դարձել, որ ՌԴ ԱԳՆ-ն իր մեկնաբանության մեջ մտահոգություն է հայտնել Վրաստանի կողմից ռուսական, աբխազական և հարավօսական սահմանների անօրինական հատման դեպքերի աճի կապակցությամբ։ Մոսկվան մատնանշել է նման միջադեպերի «սադրիչ բնույթը» և նշել տեղի ունեցողը քաղաքականացնելու Թբիլիսիի ցանկությունը՝ չնայած երկխոսության ռուսական կողմի պատրաստակամությանը։
Տաթև Ֆռանգյան
