Քաղաքականություն
22.04.2022 | 21:27
Գազայի հատվածը վերահսկող ՀԱՄԱՍ շարժումը կոչ է արել բոլոր պաղեստինցիներին՝ «անկոտրում պաշտպանել» Արևելյան Երուսաղեմում գտնվող Ալ-Աքսա մզկիթը, գրում է ՏԱՍՍ-ը:
«Մենք մոբիլիզացնում ենք մեր ուժերը՝ որտեղ հնարավոր է, և կոչ ենք անում պաղեստինցի ժողովրդին նույնպես միավորել ուժերն ու անկոտրում պաշտպանել Ալ-Աքսա մզկիթը»,- հաղորդում է Al-Mayadeen-ը:
Ըստ ՀԱՄԱՍ-ի՝ «իսրայելական օկուպանտների հանցագործությունների դեմ պայքարելու համար անհրաժեշտ է համակարգել տարածաշրջանում շարժման բոլոր ստորաբաժանումների գործողությունները»։
«Ալ-Աքսա մզկիթի հավատացյալների վրա հարձակումները միայն նշանակում են, որ Իսրայելի ղեկավարության, ներառյալ՝ վարչապետ Նաֆթալի Բենեթի և արտգործնախարար Յաիր Լապիդի քաղաքական ապագան դատապարտված են ձախողման»,- ասել է ՀԱՄԱՍ-ի անդամ Մուշիր ալ-Մասրին։
Հիշեցնենք, որ Իսրայելի անվտանգության ուժերն ապրիլի 15-ին լուսաբացից առաջ, երբ հազարավոր պաղեստինցիներ հավաքվել էին սուրբ Ռամադան ամսվա ընթացքում աղոթքի համար, մտել են Երուսաղեմի Ալ-Աքսա մզկիթի համալիր՝ հրահրելով բախումներ, որոնց հետևանքով, ինչպես հայտնել են բժիշկները, վիրավորվել է առնվազն 117 պաղեստինցի։
Իսրայելը հայտարարել է, որ իր ուժերը մզկիթի տարածք են մտել՝ հեռացնելու քարերը, որոնք հավաքվել էին բռնության ակնկալիքով: Սրբավայրը, որը սուրբ է հրեաների և մահմեդականների համար, հաճախ եղել է իսրայելա-պաղեստինյան անկարգությունների էպիկենտրոնը, լարվածությունը սրվել է վերջին բռնությունների ալիքի ֆոնին: Անցյալ տարի տեղի ունեցած բախումները նպաստել են Գազայի հատվածում ՀԱՄԱՍ-ի զինյալների հետ 11-օրյա պատերազմի բռնկմանը:
Տաթև Ֆռանգյան
