15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Ռուսաստանում դատարանը հրաժարվել է վերականգնել «Էխո Մոսկվի» ռադիոկայանի եթերը և կայքը
Քաղաքականություն
20.04.2022 | 18:24
Մոսկվայի Տագանսկի դատարանը մերժել է անօրինական ճանաչել «Էխո Մոսկվի» ռադիոկայանի եթերի և կայքի հասանելիության սահմանափակումը։ Մարտի 1-ին Գլխավոր դատախազության պահանջով դրանք արգելափակվել էին Ռոսկոմնադզորի կողմից։ Դրանից հետո ռադիոկայանի գլխավոր բաժնետերը՝ մերձպետական «Գազպրոմ-Մեդիա» հոլդինգը, փակել էր խմբագրությունը։ Գործի արդյունքների մասին ապրիլի 20-ին հայտնել է Новая газета.Европа-ն։
«Էխոյի» փաստաբանները փորձել են ապացուցել, որ Գլխավոր դատախազության ցուցումներում նշված չէ, թե ռադիոկայանն ի՞նչ խախտումներ է ունեցել եթերում, և ո՞ր հրապարակումներն են խախտում ռուսական օրենքները։ Սակայն դատավոր Նադեժդա Կիսելեւան այս փաստարկներն անհիմն է համարել։
Ռադիոկայանի նախկին գլխավոր խմբագիր և բաժնետեր Ալեքսեյ Վենեդիկտովը Տելեգրամում հայտնել է, որ դատարանի որոշումը կբողոքարկվի։ Նրա խոսքով՝ նիստի ընթացքում պարզվել է, որ Գլխավոր դատախազությունը չի պահանջել լուծարել «Էխո Մոսկվի» կայքը՝ որպես լրատվամիջոց, և չի նշել ռադիոկայանի հեռարձակման մասին։
Ուկրաինայի հետ պատերազմի սկսվելուց հետո Ռուսաստանում փաստացի մտցվել է ռազմական գրաքննություն, և տասնյակ լրատվամիջոցներ փակվել են կամ արգելափակվել։
Տաթև Ֆռանգյան
