Դոնբասում մարտերը սրվում են. Մոսկվան փորձում է ճեղքել Ուկրաինայի պաշտպանությունը․ Մեծ Բրիտանիայի ՊՆ

Մեծ Բրիտանիայի Պաշտպանության նախարարությունն Ուկրաինայում տիրող իրավիճակի հերթական ամփոփագիրն է հրապարակել, գրում է BBC-ի ռուսական ծառայությունը։

Ըստ Բրիտանիայի պաշտպանական գերատեսչության՝ ամենաակտիվ ռազմական գործողություններն ընթանում են Դոնեցկի ու Լուգանսկի շրջաններում։ Նշվում է, որ ուկրաինական զորքերը հետ են մղում ռուսական բանակի հարձակման բազմաթիվ փորձերը։

«Ռուսական հրետակոծությունները շարունակում են ուժեղանալ Դոնբասի՝ ուկրաինական վերահսկողության տակ գտնվող հատվածի և գրավված շրջանների շփման գծի երկայնքով»,- ասվում է հաղորդագրության մեջ։

Ընդգծվում է, որ Ռուսաստանի գործողություններին դեռևս խանգարում են բնական, լոգիստիկ և տեխնիկական դժվարությունները, որոնց նա արդեն իսկ բախվել է այս պատերազմի ընթացքում։

Ըստ Բրիտանիայի ՊՆ-ի՝ Ռուսաստանն «անխտիր հարձակումների» է դիմում պաշարված Մարիուպոլում, ինչը, ըստ գերատեսչության, վկայում է Մոսկվայի՝ անհրաժեշտ արագությամբ իր առաջադրանքները լուծելու անկարողության մասին։

«Ռուսաստանի ավիացիոն ակտիվությունը Ուկրաինայի հյուսիսում, ամենայն հավանականությամբ, ցածր կմնա Կիևի հյուսիսում ռուսական ուժերի հետ քաշվելու ֆոնին: Այնուամենայնիվ, ողջ Ուկրաինայում առաջնահերթ թիրախների դեմ բարձր ճշգրտության հարվածների վտանգը պահպանվում է»,- հայտարարել է Բրիտանիայի ՊՆ-ն։

Ըստ այդ տեղեկությունների՝ ռուս զինվորականները «կփորձեն խափանել ուկրաինական զորքերի և սպառազինությունների տեղափոխումը երկրի արևելք»։

Էմմա Չոբանյան