Թուրքիան կարևոր դեր է խաղում Ռուսաստանին պատասխանատվության ենթարկելու հարցում․Նեդ Փրայս

ԱՄՆ հայտարարել է, որ ՆԱՏՕ-ի դաշնակից Թուրքիան առանցքային դերակատարում ունի Ուկրաինայի պատերազմում Ռուսաստանի պատասխանատվության կանչելու հարցում, գրում է «Ահվալ» գործակալությունը։

Թուրքիան ու ԱՄՆ-ն կարևոր երկկողմ գործընկերներ են ընդհանուր շահերով։ Նման հայտարարություն է արել ճեպազրույցում ԱՄՆ Պետքարտուղարության մամուլի խոսնակ Նեդ Փրայսը։

Նա նշել է, որ պետքարտուղար Էնթոնի Բլինքենը հյուրընկալելու է Թուրքիայի ԱԳ նախարար Մևլութ Չավուշօղլուին մայիսի 18-ին Վաշինգտոնում։ Նրանք քննարկելու են հարցերի լայն շրջանակ, այդ թվում՝ «Թուրքիայի կարևոր դերը Ռուսաստանին պատասխանատվության ենթարկելու՝ Ուկրաինայի ժողովրդի, կառավարության, պետության դեմ պատերազմելու համար»։

Թուրքիան ու ԱՄՆ-ն ձգտում են վերականգնել հարաբերությունները, որոնք խաթարվել են տարածաշրջանային հարցերում տարաձայնությունների, նաև ՌԴ-ից C-400 համակարգերի գնման պատճառով։ Սա հանգեցրել է նրան, որ ԱՄՆ-ն անգամ պատժամիջոցներ է սահմանել Թուրքիայի ռազմարադյունաբերության գործակալության վրա ու հեռացրել F-35 կործանիչների ծրագրից։

Կործանիչների խնդրին անդրադառնալով Փրայսն ասել է, որ ԱՄՆ դիրքորոշման մեջ փոփոխություն չկա։

«Մենք շատ հստակ հայտնել ենք մեր մտահոգությունները Թուրքիայի կողմից C-400 համակարգերի տիրապետման հետ կապված։ Մենք չենք հավատում, որ C-400 համակարգը համապատասխանում է F-35 ծրագրին»,-ասել է Փրայսը։

Թուրքիան էլ բազմիցս կոչ է արել Միացյալ Նահանգներին դադարեցնել պատժամիջոցները, հոկտեմբերին էլ դիմել է Lockheed Martin-ից որպես այլընտրանք գնելու 40 F-16 կործանիչ և մոտ 80 արդիականացման սարքեր իր ունեցած F-16-ների համար:

Մարտին ԱՄՆ կառավարությունը նամակ էր ուղղել Կոնգրեսին, որում ասվում է, որ թուրքական այդ դիմումը համապատասխանում է Միացյալ Նահանգների ազգային շահերին ու ծառայում ՆԱՏՕ-ի երկարաժամկետ միասնությանը։

Էմմա Չոբանյան