09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
«Հզոր զենքի» խմբաքանակից ամերիկյան մատակարարումները սկսել են հասնել Ուկրաինա
Քաղաքականություն
18.04.2022 | 16:45
ԱՄՆ-ի կողմից Կիևին ուղարկված զենքի, զինամթերքի և անվտանգության աջակցության համար մատակարարումները՝ որպես վերջին 800 միլիոն դոլարի օգնության փաթեթի մաս, արդեն սկսել են ժամանել Ուկրաինա։ Այս մասին հաղորդում է CNN-ը՝ հղում անելով ԱՄՆ կառավարությունում սեփական աղբյուրներին:
CNN-ը հիշեցնում է, որ ԱՄՆ նախագահ Ջո Բայդենն անցյալ շաբաթ հավանություն է տվել Ուկրաինային զենքի և զինամթերքի լրացուցիչ խմբաքանակի տրամադրմանը։
Վաշինգտոնն առաջին անգամ համաձայնել է Կիևին տրամադրել այնպիսի հզոր զենքեր, որոնց փոխանցումը մի քանի շաբաթ առաջ Բայդենի վարչակազմի որոշ պաշտոնյաները համարում էին էսկալացիայի ռիսկ։ Այդ զենքերի թվում են 11 Մի-17 ուղղաթիռ, 18 155 մմ-անոց հաուբից, ինչպես նաև ևս 300 Switchblade անօդաչու թռչող սարք։
Ուրբաթ ԱՄՆ Պաշտպանության նախարարության բարձրաստիճան պաշտոնյան հայտարարել էր, որ զենքով և տեխնիկայով բեռնված առաջին թռիչքը պետք է տարածաշրջան ժամանի մոտակա 24 ժամվա ընթացքում, որից հետո նախատեսվում էր այն հանձնել սահմանին գտնվող Ուկրաինայի ներկայացուցիչներին։
Ուկրաինայի նախագահ Վլադիմիր Զելենսկին շաբաթ ուկրաինական լրատվամիջոցներին տված հարցազրույցում կարծիք էր հայտնել, որ Միացյալ Նահանգները, Մեծ Բրիտանիան, Լեհաստանը և մի շարք այլ երկրներ «շատ լավ են» աջակցում ուկրաինացիներին։
«Բայց նրանք կարող են ավելի շատ անել: Նրանք միանշանակ կարող են շատ ավելի շատ անել»,- ասել է Զելենսկին:
Տաթև Ֆռանգյան
