20.08.2026 | 23:01
«Նոան» նոր գլխավոր մարզիչ ունի
Ուկրաինան ամբողջությամբ լրացրել է Եվրամիությանը երկրի անդամակցության հարցաթերթիկը
Քաղաքականություն
18.04.2022 | 12:11
Ուկրաինայի կառավարությունն ամբողջությամբ լրացրել է Եվրամիությանը երկրի անդամակցության հարցաթերթիկը։ Այս մասին ապրիլի 17-ին ուկրաինական հեռուստատեսության եթերում հայտարարել է Ուկրաինայի նախագահի աշխատակազմի ղեկավարի տեղակալ Իգոր Ժովկվան, գրում է DW-ի ռուսական ծառայութունը։
«Ինչպես նախագահը խոստացել էր Եվրահանձնաժողովի ղեկավար Ուրսուլա ֆոն դեր Լեյենին, երբ նա ապրիլի 9-ին այցելեց Ուկրաինա, ուկրաինական կողմը մեկ շաբաթվա ընթացքում լրացրեց հարցաթերթիկը»,- ասել է նա։
Ժովկվան հավելել է, որ Կիևից այս փաստաթուղթը ստանալուց հետո Եվրահանձնաժողովը պետք է հանձնարարական պատրաստի Ուկրաինայի կողմից ԵՄ-ին միանալու չափանիշների կատարման վերաբերյալ։
«Մենք ակնկալում ենք, որ մեր ներկայացրած տեղեկատվության հիման վրա նման հանձնարարականը դրական կլինի, այնուհետև գնդակը կլինի ԵՄ անդամ երկրների դաշտում», – ասել է ուկրաինացի դիվանագետը։
Նրա խոսքով՝ Կիևն ակնկալում է, որ Ուկրաինան ԵՄ անդամակցության թեկնածու երկրի կարգավիճակ կստանա Եվրախորհրդի նիստում, որը տեղի կունենա հունիսին։
Հիշեցնենք՝ Վլադիմիր Զելենսկին ստորագրել է իր երկիրը ԵՄ-ին անդամակցության դիմումը փետրվարի 28-ին՝ Ուկրաինայում ՌԴ ռազմական գործողությունների մեկնարկից անմիջապես հետո։ Եվրահանձնաժողովի նախագահ Ուրսուլա ֆոն դեր Լեյենը ապրիլին Կիև կատարած այցի ընթացքում Ուկրաինայի ղեկավարին է փոխանցել թեկնածու երկրի կարգավիճակի գրանցման հարցաթերթիկը։
Ավելի վաղ՝ մարտի 7-ին, Եվրոպական խորհրդի նախագահ Շառլ Միշելը հայտարարել էր, որ ԵՄ երկրների դեսպանները հանձնարարել են Եվրահանձնաժողովին կարծիք հայտնել Ուկրաինայի՝ Եվրամիությանն անդամակցելու դիմումի վերաբերյալ։
Մարտի 3-ին Վրաստանն ու Մոլդովան ևս հայտարարել են, որ դիմում են ԵՄ-ին անդամակցելու համար։
Տաթև Ֆռանգյան
