24.08.2026 | 23:26
Ծանրորդ Տիգրան Ավետիսյանը՝ Եվրոպայի Մ15 տարեկանների չեմպիոն
Շինարարության ծավալներն աճել են շուրջ 5 տոկոսով․ տվյալներ Վիճակագրական կոմիտեից
Տնտեսություն
15.04.2022 | 18:15
Այս տարվա հունվար-փետրվար ամիսներին Հայաստանում շինարարության ծավալը նախորդ տարվա նույն ժամանակահատվածի համեմատ աճել է 4,9 %-ով՝ կազմելով 32 մլրդ 735.4 մլն դրամ։ Այս մասին տեղեկանում ենք Վիճակագրական կոմիտեի հրապարակած տվյալներից։
Շինարարության կեսից ավելին՝ 57.5 %-ը կատարվել է մասնավոր սեկտորի միջոցների հաշվին։ Կազմակերպությունները, ընդհանուր առմամբ, Հայաստանում շինարարության մեջ 18 մլրդ 825.3 մլն դրամ գումար են ներդրել։
Շինարարության 25 %-ը կատարվել է բնակչության միջոցների հաշվին։ Այս ամիսներին պետության միջոցների հաշվին կատարվել է ընդհանուր շինարարության միայն 15․4 %-ը՝ նախորդ տարվա 26,8 %-ի փոխարեն։ Շինարարության մեջ ներդրված պետական միջոցները, ընդհանուր առմամբ, նախորդ տարվա նույն ժամանակահատվածի համեմատ նվազել են 35․4 %-ով։
Այսպես․ այս տարվա հունվար-փետրվար ամիսներին պետական բյուջեի հաշվին ավելի քան 5 մլրդ դրամի շինարարություն է կատարվել․ նախորդ տարի այդ թիվը 7,7 մլրդ է եղել։
Նվազել է նաև համայնքների միջոցների հաշվին կատարվող շինարարությունը․ եթե նախորդ տարվա հունվար-փետրվար ամիսներին համայնքային միջոցների հաշվին 657 մլն դրամի շինարարություն էր կատարվել, այս տարի այդ թիվը կազմել է 445 մլն դրամ։
Օտարերկրյա ներդրողների միջոցներով կատարվող շինարարությունը ևս նվազել է 58․6 %-ով՝ կազմելով շուրջ 1 մլն դոլար՝ նախորդ տարվա նույն ժամանակահատվածի 2,2 մլն դոլարի համեմատ։
Ընդհանուր առմամբ՝ շինարարության ոլորտում 4,9 % աճը գրանցվել է մարդասիրական օգնության միջոցների, կազմակերպությունների միջոցների հաշվին։
Մարդասիրական օգնության հաշվին կատարվող շինարարությունը աճել է 13 %-ով։ Մարդասիրական օգնության կառուցվածքում մեծ դեր է կատարում «Հայաստան համահայկական հիմնադրամի» միջոցների հաշվին կատարված շինարարությունը։ Հիմնադրամի տրամադրած միջոցները, նախորդ տարվա համեմատ աճել են շուրջ 72 %-ով։
