09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Լեհաստանը Ռուսաստանից ածխի մատակարարումների էմբարգո է սահմանել
Քաղաքականություն
15.04.2022 | 17:43
Լեհաստանը Ռուսաստանից ածխի մատակարարումների էմբարգո է սահմանել։ Այս քայլն ընդունվել է «Ուկրաինայի դեմ ռուսական ագրեսիային աջակցությանը հակազդելու և ազգային անվտանգության ապահովման մասին օրենքի շրջանակում», որը ստորագրվել է Լեհաստանի նախագահ Անջեյ Դուդայի կողմից ապրիլի 14-ին, հաղորդում է DW-ի ռուսական ծառայությունը՝ հղում կատարելով լեհական dorzeczy.pl ինտերնետային պորտալին։
Օրենքի համաձայն՝ արգելվում է ածխի և կոքսի ներմուծումը Ռուսաստանից ու Բելառուսից, ներառյալ՝ այդ էներգառեսուրսների տարանցումը Լեհաստանի տարածքով։ Այն նաև նախատեսում է իրավաբանական և ֆիզիկական անձանց ունեցվածքի սառեցման հնարավորություն, որոնք աջակցում են Ուկրաինայի դեմ ռուսական ագրեսիային։
Նման անձանց նկատմամբ պատժամիջոցները չկատարելու համար նախատեսվում է տուգանք՝ 20 միլիոն զլոտի (ավելի քան 4,3 միլիոն եվրո): Պատժամիջոցների ցուցակում ընդգրկվելու մասին որոշումը կկայացնի Լեհաստանի ՆԳՆ ղեկավարը։
Անջեյ Դուդայի ստորագրած օրենքը նաև արգելում է Ուկրաինայի դեմ ռուսական ագրեսիայի խորհրդանիշների օգտագործումը։ Խախտելը պատժվում է տուգանքով, ազատության սահմանափակմամբ կամ ազատազրկմամբ՝ առավելագույնը երկու տարի ժամկետով։
Տաթև Ֆռանգյան
