08.06.2026 | 16:44
Փաշինյանը հաղթեց․ տարածաշրջանի ապագան դեռ գրվելու փուլում է․ Դոնալդ Տուսկ
Վրաստանի իշխանությունները շուտով կհրապարակեն ԵՄ-ին անդամակցելու հարցաթերթիկը
Քաղաքականություն
15.04.2022 | 15:02
Վրաստանի կառավարությունը որոշել է շուտով հրապարակել Եվրամիության կողմից ներկայացված հարցաշարը, որը թույլ կտա քննարկում սկսել ԵՄ-ին երկրի անդամակցելու շուրջ բանակցությունների մեկնարկի վերաբերյալ։ Այդ մասին ուրբաթ հայտարարել է ԱԳ նախարար Իլյա Դարչիաշվիլին ԵՄ-ին Վրաստանի ինտեգրման կառավարական հանձնաժողովի նիստից հետո կայացած ճեպազրույցում, գրում է ՏԱՍՍ-ը։
«Մենք գիտենք, որ հասարակությունը մեծ հետաքրքրություն է ցուցաբերում այս փաստաթղթի նկատմամբ։ Այսօր Վրաստանի վարչապետի գլխավորությամբ տեղի է ունեցել կառավարական հանձնաժողովի նիստ, և որոշվել է, որ այս փաստաթուղթը կհրապարակվի։ Մենք կապահովենք, որ այս փաստաթուղթը հնարավորինս շուտ հասանելի դառնա շահագրգիռ կողմերին»,- ասել է Դարչիաշվիլին։
Վրացական ընդդիմությունը բազմիցս հանդես է եկել հարցաթերթիկը հրապարակելու նախաձեռնությամբ, որպեսզի հանրապետության բնակիչներին պարզ լինի, թե կառավարությունն ինչ պատասխաններ է նախատեսում պատրաստել։ Սակայն իշխանությունները վկայակոչեցին այն փաստը, որ փաստաթուղթը հանձնվել է գաղտնիության հիմունքներով։ Այդ նպատակով ընդդիմադիր պատգամավորների ութ անդամներից բաղկացած խումբը նամակ է ուղարկել Եվրոպական հարևանության և ընդլայնման քաղաքականության հարցերով հանձնակատար Օլիվեր Վարհեիին՝ խնդրելով թույլտվություն տրամադրել հարցաթերթիկը հրապարակելու համար։
Տաթև Ֆռանգյան
