Արտոնյալ վարկեր` բնակարաններում էներգախնայող համակարգեր տեղադրելու համար․ ՏԵՍԱՆՅՈՒԹ

Կառավարությունը հաստատեց բնակարանների և անհատական բնակելի տների էներգաարդյունավետ վերանորոգման աշխատանքների պետական աջակցության ծրագիրը. պետությունը մասնակի կամ ամբողջությամբ կսուբսիդավորի վարկերի տոկոսադրույքները:

«Հայաստանում, վիճակագրական տվյալների համաձայն, առկա է շուրջ 870 հազար բնակելի միավոր՝ 450 հազար բնակարան, 420 հազար բնակելի տուն: Բնակֆոնդի հիմնական մասը շահագործման է հանձնվել խորհրդային տարիներին, և սեփականաշնորհման գործընթացից ի վեր դրանց զգալի մասում վերանորոգման աշխատանքներ չեն իրականացվել: Բնակֆոնդի նշված հատվածում իրականացված չեն նաև էներգաարդյունավետության միջոցառումներ, ինչի արդյունքում տնային տնտեսությունները չեն կարողանում բավարար չափով ջեռուցել իրենց բնակարանները, և այդ տնտեսությունների կեսից ավելին կարող է համարվել էներգետիկ աղքատ»,- նշեց Քաղաքաշինության պետական կոմիտեի նախագահ Արմեն Ղուլարյանը:

Ծրագրի շրջանակում պետական աջակցություն նախատեսվում է ցուցաբերել բնակարանի կամ բնակելի տան էներգաարդյունավետ վերանորոգման վարկի տարեկան տոկոսադրույքի ամբողջական կամ մասնակի սուբսիդավորման միջոցով:

«Ծրագրով դիտարկվում են գոյություն ունեցող բազմաբնակարան շենքի բնակարանը կամ անհատական բնակելի տունը, բացառությամբ 4-րդ կարգի վնասվածություն ունեցող բնակարանների և բնակելի տների»,- ասաց Ղուլարյանը:

Նա հավելեց, որ սահմանամերձ կամ բարձրլեռնային բնակավայրերում վերանորոգվող գույքերի մասով վարկերի տոկոսադրույքների սուբսիդավորումը կիրականացվի այնպիսի չափաքանակով, որ շահառուներին վարկը տրամադրվի 0 տոկոս տոկոսադրույքով:

Սահմանամերձ բնակավայր չհանդիսացող գյուղական բնակավայրերում վարկը կտրամադրվի 2 տոկոս տոկոսադրույքով: Երևանում այն կկազմի 5 տոկոս: