26.06.2026 | 08:14
ԱԱ-2026. ԱՄՆ-ը պարտվեց գոլառատ խաղում, Ավստրալիան փլեյ-օֆֆում է. ՏԵՍԱՆՅՈՒԹ
ՀՀ-ն ռուսական գազի դիմաց վերջին վճարումներն իրականացրել է ռուբլով․ Քերոբյանի հարցազրույցը RBC-ին
Քաղաքականություն
15.04.2022 | 13:08
ՀՀ-ի և ՌԴ-ի միջև ապրանքաշրջանառության հարցում պետք չէ վճարման հնարավոր եղանակներից բացառել հայկական դրամը։ Այս մասին RBC-ին տված հարցազրույցում հայտարարել է ՀՀ էկոնոմիկայի նախարար Վահան Քերոբյանը՝ պատասխանելով այն հարցին, թե 2022 թվականին ինչպես կփոխվի արժույթային համակարգը և արդյո՞ք խնդիրներ կառաջանան ռուսական ռուբլով կամ առհասարակ ազգային արժույթով առևտրի ընդլայնման անցնելու դեպքում։
«Դուք ասացիք «ազգային արժույթներով», և սա ճիշտ արտահայտությունն է, քանի որ վճարման հնարավոր եղանակներից պետք չէ բացառել հայկական դրամը կամ ղազախական տենգեն։ Կարծում ենք, որ երկրների կենտրոնական բանկերը պետք է համապատասխան միջավայր ստեղծեն ազգային արժույթով վճարումներ իրականացնելու տեսանելիության կամ փոխարժեքի կանխատեսելիության համար։ Իհարկե, կենտրոնական բանկերը ի սկզբանե ասում են, որ իրենց հիմնական նպատակը գնաճի զսպումն է, բայց հենց առևտրի դյուրացումն է ազդում գների մակարդակի վրա։ Եթե ազատ առևտրի համար համապատասխան գործիքներ տրվեն, ապա կարելի է ակնկալել, որ ծախսերը կնվազեն կամ գներն էլ ավելի ցածր կլինեն:
Անդրադառնալով ՀՀ մատակարարվող գազի ու նավթամթերքի դիմաց վճարումներին՝ Քերոբյանը նշել է, որ վերջին մի քանի վճարումներն ՀՀ-ն իրականացրել է ռուբլով։
«Որքան գիտեմ, վերջին մի քանի վճարումները եղել են ռուբլով, բայց համապատասխան փոխարժեքով։ Այսինքն՝ գնագոյացումը դոլարով է, բայց վճարումն այժմ կատարվում է ռուբլով, եթե չեմ սխալվում։ Ինչ վերաբերում է գնագոյացման կամ վճարման ոլորտում հետագա հարցերին, ապա, կարծում եմ, ըմբռնում կա՝ պետք է շարժվել դեպի ազգային արժույթներ։ Եվ կարծում եմ, որ ռուսական կողմից էլ այս ուղղությամբ առաջընթաց կա»,- ասել է ՀՀ էկոնոմիկայի նախարարը։
Տաթև Ֆռանգյան
