Մենք անելու ենք Արցախը փրկելու համար բոլոր քայլերը. Դավիթ Բաբայան․ ՏԵՍԱՆՅՈւԹ

Արցախի Ազգային ժողովի պատգամավորների նախաձեռնությամբ գումարվել է Արցախի ԱԺ արտահերթ նիստ՝ Ազգային ժողովի հայտարարության մասին օրակարգով։

Ավելի վաղ Արցախի ԱԺ նախագահ Արթուր Թովմասյանը խմբակցությունների ղեկավարների և աշխատակազմի պատասխանատուների մասնակցությամբ հրավիրել էր աշխատանքային խորհրդակցություն։ Խորհրդակցության ընթացքում որոշվել է Արցախի Հանրապետության Սահմանադրության 114-րդ հոդվածի 2-րդ մասի և «Ազգային ժողովի կանոնակարգ» օրենքի 37-րդ հոդվածի 1-ին մասի համաձայն ԱԺ արտահերթ նիստ հրավիրել։

Նիստի ընթացքում ելույթ է ունեցել նաև Արցախի ԱԳ նախարար Դավիթ Բաբայանը։

«Մենք գտնվում ենք երևի մեր պատմության ամենաբարդ ժամանակահատվածում»,-  նշեց ԱՀ արտգործնախարար Դավիթ Բաբայանը:

«Մենք դարեր շարունակ անցել ենք շատ բարդությունների միջով, ունեցել ենք կորուստներ, բայց հիմա մեր առջև դրված է մեր ժողովրդի, մեր պետականության ապագայի հարցը։ Մենք պետք է սա քաջ գիտակցենք։ Հիմա որոշվում է ոչ միայն Արցախի, այլև հայ ժողովրդի, Հայոց պետականության ճակատագիրը»,- նշեց Բաբայանը՝ ընդգծելով, որ պատասխանատվության զգացում պետք է միշտ ունենալ։

«Խոսելով Արցախի կարգավիճակի, տարբեր նշաձողերի մասին` պետք է նշել, որ մենք նշաձողեր չունենք այլևս, այլ ունենք կարմիր գծեր, որոնց խախտումը կբերի ողբերգության։ Ադրբեջանի կազմում Արցախը ունի ընդամենը մեկ ապագա` ցեղասպանություն։ Հայրենիքը կորցնելու ենք։ Արցախի կորստից հետո, չի լինելու Հայաստանի Հանրապետություն, ընդամենը ժամանակի խնդիր է լինելու»,- նշեց Արցախի ԱԳ նախարարը։

«Արցախի Հանրապետությունն իրականացնելու է բոլոր քայլերը՝ հասնելու նրան, որ փրկի այն, ինչ մնացել է Արցախից»- վստահեցրեց Դավիթ Բաբայանը՝ հավելելով՝ շատ լավ է, որ մենք միասնական պայքարում ենք մեր երկրի ապագայի համար:

Մանրամասները՝ տեսանյութում։