18.05.2026 | 23:42
«Անկախ դիտորդ»-ը պահանջում է ազատ արձակել Արթուր Օսիպյանին և պարզաբանում տալ նրա ձերբակալության հիմքերի վերաբերյալ
Բայդենի խորհրդականը հայտարարել է, որ մարտերը Ուկրաինայում, հնարավոր է, ամիսներ կամ ավելի երկար տևեն
Քաղաքականություն
14.04.2022 | 19:14
ԱՄՆ նախագահը գնահատել է, որ «ռուսներն ու Պուտինը, կարծես, ցանկանում են ջնջել ուկրաինական ինքնության գաղափարը, ինքնության անկախության գաղափարը»։ Այս մասին հայտարարել է ԱՄՆ նախագահի ազգային անվտանգության հարցերով խորհրդական Ջեյք Սալիվանը՝ պատասխանելով Ջո Բայդենի մեկնաբանությունների մասին հարցին, թե նա կարծում է, որ Ռուսաստանի նախագահ Վլադիմիր Պուտինը ցեղասպանություն է իրականացնում ուկրաինացիների դեմ, գրում է CNN-ը։
«Եվ երբ դա համատեղում եք զանգվածային սպանությունների հետ, նախագահի տեսանկյունից դա ցեղասպանություն է»,- նշել է Սալիվանը՝ նշելով, որ կա մի գործընթաց, որի միջով պետք է անցնի Պետքարտուղարությունը, որպեսզի պաշտոնական որոշում կայացնի՝ արդյո՞ք Ռուսաստանի գործողությունները համապատասխանում են Ցեղասպանության մասին կոնվենցիայի իրավական չափանիշներին:
Բացի այդ, Սալիվանն ասել է, որ Ուկրաինայում մարտերը, հավանաբար, շարունակվելու են ամիսեր կամ նույնիսկ ավելի երկար։
Նա, սակայն, հավելել է, որ «նախնական եզրակացություն չկա», որ ԱՄՆ-ը կվերացնի Ռուսաստանի դեմ պատժամիջոցները, եթե նա դիվանագիտական համաձայնության գա Ուկրաինայի հետ:
«Շատ բան կախված է նրանից, թե ինչպիսին է այդ դիվանագիտական համաձայնագրի ձևն ու շրջանակը, և շատ բան կախված է նրանից, թե ինչի շուրջ կխորհրդակցեն ուկրաինացիները մեզ հետ, և եվրոպացիները կհամաձայնվեն»,- ասել է ամերիկացի պաշտոնյան՝ հավելելով, որ թեև ԱՄՆ-ն «ակտիվորեն չի մասնակցում» բանակցություններին, ուկրաինացի պաշտոնյաները պարբերաբար շփվում են ԱՄՆ-ի հետ բանակցությունների վերաբերյալ։
Նա նշել է, որ ԱՄՆ-ը Ռուսաստանին հասկացրել է, որ ծանր հետևանքներ կլինեն, եթե օգտագործվեն զանգվածային ոչնչացման զենքեր, ինչպիսիք են քիմիական կամ կենսաբանական զենքերը:
Էմմա Չոբանյան
