18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Ուկրաինան հայտարարել է ռուսական «Մոսկվա» հրթիռային հածանավի խոցման մասին․ ՌԴ-ն հաստատել է նավի վրա պայթյունը
Քաղաքականություն
14.04.2022 | 14:16
Չորեքշաբթի Օդեսայի վարչակազմի ղեկավարը հայտարարել է Ռուսաստանի ՌԾՈՒ Սևծովյան նավատորմի դրոշակակիր «Մոսկվա» հրթիռային հածանավին «Նեպտուն» թևավոր հրթիռներով հարվածելու մասին։ Արդեն կեսգիշերից հետո ՌԴ ՊՆ-ն հաստատել է «Մոսկվա» հածանավի վրա տեղի ունեցած հրդեհն ու պայթյունը, սակայն չի նշել դրանց պատճառը, գրում է BBC-ի ռուսական ծառայությունը։
Հածանավը 1164 «Ատլանտ» նախագծի գլխավոր նավն է։ Այն ստեղծվել է խորհրդային տարիներին Ուկրաինայում՝ Նիկոլաևի նավաշինարանում, որը գործարկվել է 1982 թվականին և ի սկզբանե կրել է «Սլավա» անունը։ Այն եղել է Միխայիլ Գորբաչովին ուղեկցող նավերի խմբում՝ 1989 թվականին Մալթայում Ամերիկայի նախագահ Ջորջ Բուշի հետ գագաթնաժողովին։
2000 թվականին արդեն «Մոսկվա» անվան տակ նավը դարձել է Ռուսաստանի ռազմածովային նավատորմի Սևծովյան նավատորմի դրոշակակիրը։ Հածանավը մասնակցել է մի շարք զինված հակամարտությունների, այդ թվում՝ Սիրիայում ռուսական գործողությանը։ Դրանից հետո նավը մի քանի տարի վերանորոգվել է։
Նավի անձնակազմը 510 հոգի է, երկարությունը՝ 190 մետր։ Այն համալրված է թևավոր հրթիռների համալիրով, մի քանի զենիթահրթիռային համակարգերով, հրետանային և հականավային զենքերով։
Տաթև Ֆռանգյան
