29.06.2026 | 00:59
ԱԱ-2026. Վերջին վայրկյաններին հաղթական գոլ` փլեյ-օֆֆի մեկնարկային խաղում. ՏԵՍԱՆՅՈՒԹ
Քաբուլում Իրանի դիվանագիտական ներկայացուցչությունները քարկոծելուց հետո ԱԳՆ է կանչվել Աֆղանստանի գործերի ժամանակավոր հավատարմատարը
Քաղաքականություն
12.04.2022 | 16:45
Իրանում Աֆղանստանի գործերի ժամանակավոր հավատարմատարը երեքշաբթի կանչվել է երկրի ԱԳՆ։ Fars գործակալության հաղորդմամբ՝ նրան խիստ բողոք են հայտնել, և Քաբուլում Իրանի դեսպանատան հյուպատոսական բաժինը մինչև հետագա ծանուցում հայտարարվել է փակ, գրում է ՏԱՍՍ-ը։
Ավելի վաղ Քաբուլում Իրանի դեսպանատան և Հերաթում գլխավոր հյուպատոսության դիմաց բողոքի ցույցեր են անցկացվել, դիվանագիտական ներկայացուցչությունների վրա քարեր են նետվել։ Իրանում Աֆղանստանի գործերի ժամանակավոր հավատարմատարին հիշեցրել են օտարերկրյա դիվանագիտական ներկայացուցչությունների անվտանգությունն ապահովելու՝ հյուրընկալող կառավարության պատասխանատվության մասին։ Իրանի ԱԳՆ-ն Աֆղանստանին կոչ է արել պատասխանատվության ենթարկել Իրանի դեսպանատան և գլխավոր հյուպատոսության վրա հարձակում գործած անձանց։
Երկուշաբթի Հերաթի բնակիչները բողոքի ցույց են անցկացրել Իրանում աֆղան փախստականների և միգրանտների նկատմամբ ճնշումների դեմ։ Ցույցին մասնակցել է մի քանի հարյուր մարդ։
Ապրիլի 7-ին աֆղանական TOLO News հեռուստաալիքը հայտնել է, որ Իրանում աֆղան փախստականները բողոքում են երկրում իրենց գտնվելու պայմանների վատթարացումից։ Նրանցից շատերը չունեն փաստաթղթեր, այդ թվում՝ վիզա։ Նշվել է, որ սոցիալական ցանցերում տեսանյութեր են տարածվում, որտեղ երևում է, որ «Իրանում աֆղան փախստականները հետապնդվում և խոշտանգվում են»։ Իր հերթին, Քաբուլում Իսլամական Հանրապետության դեսպանությունը հերքել է այս տվյալները՝ դրանք անվանելով ոչ հավաստի։
Տաթև Ֆռանգյան
