19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Ֆրանսիայում նախագահ կընտրեն երկրորդ փուլով․ Մակրոնն ու Լը Պենը գրեթե հավասար ձայներ են հավաքել
Քաղաքականություն
11.04.2022 | 11:10
Ֆրանսիայում նախագահական ընտրությունների երկրորդ փուլ կանցկացվի, որտեղ կպայքարեն գործող նախագահ Էմանուել Մակրոնն ու ծայրահեղ աջ «Ազգային միավորման» ղեկավար Մարին Լե Պենը, գրում է DW-ի ռուսական ծառայությունը։
Քվեաթերթիկների 97%-ի հաշվարկի արդյունքներով՝ Մակրոնի օգտին քվեարկել է ընտրողների 27,6%-ը, Լը Պենի օգտին՝ 27,41%-ը։ Երրորդ տեղը զբաղեցրել է «Անհնազանդ Ֆրանսիա» ձախամետ կուսակցության առաջնորդ Ժան Լյուկ Մելանշոնը, որին աջակցել է քվեարկածների 22%-ից մի փոքր պակաս։
Մարին Լը Պենը աջակիցներին ուղղված ուղերձում կոչ է արել բոլորին, ովքեր առաջին փուլում ձայն չեն տվել Մակրոնի օգտին, քվեարկել իր օգտին։ Լը Պենը հայտարարել է, որ ինքը լինելու է «բոլոր ֆրանսիացիների նախագահը»։
«Ես մտադիր եմ առանց հապաղելու կարել այն բացերը, որոնցից տառապում է պատառոտված Ֆրանսիան, և որոնց հետ իշխանությունները մինչ այժմ ոչինչ չեն կարողացել անել», – ասել է Լը Պենը։
Պահպանողական թեկնածու Վալերի Պեկրեսը նշել է, որ Լը Պենը «պատմականորեն մոտ» է եղել Վլադիմիր Պուտինին, և դա վարկաբեկում է նրան։
Մակրոնի օգտին երկրորդ փուլում քվեարկելու կոչ են արել Փարիզի քաղաքապետ Անն Իդալգոն, կոմունիստ Ֆաբիեն Ռուսելը և կանաչների թեկնածու Յանիկ Ժադոն։
Ֆրանսիայի նախագահն ընտրվում է հինգ տարի ժամկետով և կարող է վերընտրվել մեկ անգամ։ Ֆրանսիայի սահմանադրության համաձայն՝ եթե առաջին փուլում ոչ մի թեկնածու չի ստանում բացարձակ մեծամասնություն, ապա անցկացվում է երկրորդ փուլ։ 1965 թվականին նման կանոնների ներդրումից ի վեր Ֆրանսիայում ղեկավար է ընտրվել երկրորդ փուլով:
Ընտրությունների երկրորդ փուլը կկայանա երկու շաբաթից՝ ապրիլի 24-ին։
Տաթև Ֆռանգյան
