08.06.2026 | 13:08
Հիմա հենց այն ժամանակն է, որ Եվրամիությունն իրական աջակցություն ցուցաբերի Հայաստանին․ Զելենսկին շնորհավորել է Նիկոլ Փաշինյանին
Պուտինն ու Ալիևը քննարկել են հայ-ադրբեջանական սահմանի դելիմիտացիայի աշխատանքների մեկնարկը
Քաղաքականություն
09.04.2022 | 17:26
Ռուսաստանի և Ադրբեջանի նախագահներ Վլադիմիր Պուտինը և Իլհամ Ալիևը հեռախոսազրույց են ունեցել, որի ընթացքում քննարկել են Լեռնային Ղարաբաղի շուրջ եռակողմ պայմանավորվածությունների իրականացման անհրաժեշտությունը և հայ-ադրբեջանական սահմանի դելիմիտացիայի աշխատանքները սկսելու հարցերը: Այս մասին հայտնում է Կրեմլի մամուլի ծառայությունը։
«Քննարկվել են ապրիլի 6-ին Բրյուսելում ՀՀ վարչապետ Նիկոլ Փաշինյանի և Իլհամ Ալիևի միջև կայացած բանակցությունների արդյունքները։ Ընդ որում, ընդգծվել է Լեռնային Ղարաբաղի հարցով Հայաստանի, Ադրբեջանի և Ռուսաստանի ղեկավարների 2020 թվականի նոյեմբերի 9-ի, 2021 թվականի հունվարի 11-ի և նոյեմբերի 26-ի պայմանավորվածությունների ամբողջական իրականացման, ինչպես նաև տարածաշրջանում տնտեսական և տրանսպորտային կապերի զարգացման եռակողմ աշխատանքային խմբի գործունեության ակտիվացման անհրաժեշտությունը: Անդրադարձ է կատարվել հայ-ադրբեջանական սահմանի դելիմիտացիայի աշխատանքների մեկնարկին և Ադրբեջանի ու Հայաստանի միջև խաղաղության պայմանագրի նախապատրաստմանը»,- ասված է հաղորդագրության մեջ:
Նշվում է, որ զրույցը տեղի է ունեցել ադրբեջանական կողմի նախաձեռնությամբ:
«Հաստատվել է երկկողմանի հարաբերությունների ակտուալ օրակարգի շուրջ սերտ փոխգործակցությունը շարունակելու փոխադարձ տրամադրվածությունը»,- հավելել են Կրեմլի մամուլի ծառայությունում:
Ավելի վաղ կայացել էր Պուտին-Փաշինյան հեռախոսազրույցը։ Զրուցակիցները կարևորել են Ադրբեջանի հետ խաղաղության պայմանագրի ստորագրման և դելիմիտացիայի աշխատանքների մեկնարկի մասին պայմանավորվածությունները: Ռուսաստանի Դաշնության նախագահը պատրաստակամություն է հայտնել լիարժեք աջակցել նշված գործընթացներին: Անդրադարձ է կատարվել Լեռնային Ղարաբաղում ՌԴ խաղաղապահ զորախմբի պատասխանատվության գոտի ադրբեջանական ստորաբաժանումների ներխուժմանը: Վարչապետ Փաշինյանն արտահայտել է հայկական կողմի ակնկալիքը, որ ռուս խաղաղապահները կոնկրետ միջոցներ ձեռնարկեն ներխուժած ադրբեջանական ստորաբաժանումների դուրսբերումն ապահովելու համար:
