Կրամատորսկում «Տոչկա-Ու»-ով հարված է հասցվել կայարանին

Ուկրաինայի Կրամատորսկ քաղաքում գնդակոծվել է կայարանը։ «Ուկրզալիզնիցյա»-ի ղեկավար Ալեքսանդր Կամիշինը հայտնել է 30 զոհի և ավելի քան 100 վիրավորի մասին, գրում է BBC-ի ռուսական ծառայությունը։

Ուկրաինայի իշխանությունների տվյալներով՝ այդ պահին այնտեղ գտնվել են հազարավոր մարդիկ, որոնք ցանկացել են տարհանվել։ Դոնեցկի մարզի նահանգապետ Պավել Կիրիլենկոն պնդում է, որ հարվածը հասցվել է ռուսական «Իսկանդեր» հրթիռային համակարգից։ ԴԺՀ պաշտպանության շտաբն էլ հայտնել է, որ հարվածը հասցվել է «Տոչկա-Ու»-ից։

Ուկրաինայի նախագահ Վլադիմիր Զելենսկին նույնպես հայտարարել է, որ Կրամատորսկի երկաթուղային կայարանի վրա հարձակումն իրականացվել է «Տոչկա-Ու»-ից։

«Ռուս հրեշները չեն թողնում իրենց մեթոդները, չկարողանալով քաջությամբ դիմակայել մեզ մարտի դաշտում՝ նրանք ցինիկաբար ոչնչացնում են խաղաղ բնակչությանը»,- հայտարարել է Ուկրաինայի նախագահը։

Մինչ այդ, ՌԴ Պաշտպանության նախարարությունը հայտարարել է, որ Ռուսաստանը հրթիռային հարձակում չի գործել Կրամատորսկի վրա։

«Ռուսաստանի զինված ուժերն ապրիլի 8-ին Կրամատորսկ քաղաքում կրակային խնդիրներ չեն իրականացրել և չեն նախատեսել»,- հայտնել են ՌԴ ՊՆ-ից։

Գերատեսչությունից հավելել են, որ «Տոչկա-Ու» հրթիռները, «որոնց բեկորները հայտնաբերվել են Կրամատորսկի երկաթուղային կայարանի մոտ և հրապարակվել ականատեսների կողմից», օգտագործվում են միայն Ուկրաինայի զինված ուժերի կողմից։

Տաթև Ֆռանգյան