Էրդողանն ու նրա փեսա Սելջուկ Բայրաքթարը լրագրողների դեմ նոր հայցեր են ներկայացրել «վիրավորանքի համար»

Թուրքիայի նախագահ Ռեջեփ Թայիփ Էրդողանը շարունակում է դատական հայցեր ներկայացնել լրագրողների դեմ՝ իրեն վիրավորելու համար։ Այս անգամ նրան միացել է նաև փեսան՝ Baykar Defense ընկերության ղեկավար Սելջուկ Բայրաքթարը, գրում են թուրքական լրատվամիջոցները։ 

Էրդողանի կողմից դատական ​​հայց ներկայացնելուց հետո դատախազները մեղադրել են Evrensel օրաթերթի սյունակագիր Էնդեր Իմրեքին Թուրքիայի Քրեական օրենգրքի 299-րդ հոդվածի հատկանիշներով՝ «նախագահին վիրավորելու համար»։ Հայցը վերաբերվում է Էմրեքի անցյալ տարվա հոդվածին երկրում զանգվածային անտառային հրդեհների մասին, որը քննադատություն էր պարունակում կառավարության հասցեին՝ հրդեհաշիջման ինքնաթիռների բացակայության պատճառով։

Հոդվածում Իմրեքը հարց էր բարձրացրել, թե նախագահականին պատկանող 13 ինքնաթիռներից 8-ի վաճառքի գումարով քանի՞ հրշեջ ինքնաթիռ կարելի էր գնել։

Բաքըրքյոյի գլխավոր դատախազությունը հոդվածագրին մեղադրանք է առաջադրել, որից հետո Իմրեքը Twitter-ում գրել է. «Նրանք ցանկանում են մեզ լռեցնել։ Նախագահին վիրավորելու համար հերթական դատական գործն է հարուցվել… Հոդվածում ոչ մի քրեական տարր չկա»։

Սելջուկ Բայրաքթարն իր հերթին հայց է ներկայացրել Halk TV-ի դեմ՝ փոխահատուցում պահանջելով ոչ նյութական վնասի համար։

Մասնավորապես, փետրվարի 16-ին «Sözüm Var» հաղորդաշարի թողարկման ժամանակ հաղորդավար Շիրին Փայզընը բանակի համար անօդաչու թռչող սարքեր արտադրող Baykar Defense-ի մասին հարցեր է ուղղել İYİ («Լավ») կուսակցության պատգամավոր Ահմեթ Քամիլ Էրոզանին։ Այդ հարցերն ու պատգամավորի պատասխանները, ըստ Բայրաքթարի, վիրավորել են իր անձնական իրավունքները, և նա 150,000 լիրա է պահանջում Փայզընից և Halk TV-ից։

Էմմա Չոբանյան