Քաղաքականություն
07.04.2022 | 19:51
ԱՄՆ-ը Թուրքիային զգուշացրել է չդառնալ Ռուսաստանի օլիգարխների «կեղտոտ փողերի ավազան»։ Այս մասին գրում է «Ահվալ»-ը՝ վկայակոչելով DW-ին։
Անկարայում ԱՄՆ դեսպանատան խոսնակ Ջուլի Էադեհը լրատվամիջոցին ասել է, որ Թուրքիայի համար շատ կարևոր է թույլ չտալ, որ իր տարածքն օգտագործվի պատժամիջոցներից խուսափելու համար։
«Թուրքիան պետք է շատ զգույշ լինի»,- ասել է Էադեհը՝ մեկնաբանելով ԱՄՆ պետքարտուղարի քաղաքական հարցերով տեղակալ Վիկտորյա Նուլանդի՝ Թուրքիա կատարած այցի մանրամասները։
Նուլանդը, հիշեցնենք, հանդիպել էր Թուրքիայի ԱԳ փոխնախարար Սեդաթ Օնալին, նախագահ Էրդողանի խոսնակ և գլխավոր խորհրդական Իբրահիմ Քալընին։ Երկու երկրները գործարկել են նաև համագործակցության ռազմավարական մեխանիզմը։
Թուրքիան փետրվարին ռուսական ներխուժման սկզբում հայտարարեց Ուկրաինային աջակցելու մասին՝ կոչ անելով Մոսկվային հարգել Կիևի տարածքային ամբողջականությունը։ Սակայն Անկարան չի հետևում Արևմուտքին Ռուսաստանի կամ նախագահ Վլադիմիր Պուտինի մերձավոր գործարարների նկատմամբ պատժամիջոցներ կիրառելու հարցում:
Ավելին, Թուրքիայի իշխանությունները ռուս օլիգարխներին, գործարարներին հրավիրում են իրենց երկրում ներդրումներ անել՝ թույլ տալով խուսափել պատժամիջոցներից։
Էմմա Չոբանյան
