29.06.2026 | 00:59
ԱԱ-2026. Վերջին վայրկյաններին հաղթական գոլ` փլեյ-օֆֆի մեկնարկային խաղում. ՏԵՍԱՆՅՈՒԹ
ԱՄՆ Սենատը հավանություն է տվել Ուկրաինային զենքի հեշտ փոխանցման օրինագծին․ Վաշինգտոնը Երկրորդ համաշխարհայինից հետո առաջին անգամ է կիրառում այս ծրագիրը
Քաղաքականություն
07.04.2022 | 13:01
ԱՄՆ Կոնգրեսի Սենատը հավանություն է տվել «Ուկրաինայում ժողովրդավարությունը պաշտպանելու համար Lend-Lease-ի մասին» օրենքի նախագծին, որը պետք է պարզեցնի երկրին ռազմական օգնության տրամադրումը։ Երկրորդ համաշխարհային պատերազմից ի վեր սա ԱՄՆ-ի առաջին Lend-Lease-ի ծրագիրն է:
Օրինագիծը ժամանակավորապես վերացնում է նախագահ Ջո Բայդենի՝ վարձակալության կամ ռազմական օգնություն տրամադրելու լիազորությունների որոշակի սահմանափակումները, եթե այն նախատեսված է Ուկրաինայի համար և անհրաժեշտ է նրա քաղաքացիական բնակչությանը պաշտպանելու համար։
Օրինագծի համաձայն՝ Միացյալ Նահանգների նախագահը պետք է արագ ընթացակարգեր սահմանի, որպեսզի ապահովի ռազմական օգնության ժամանակին տրամադրումը:
Lend-Lease-ը ԱՄՆ կառավարության ծրագիրն է, որը կիրառվել է Երկրորդ համաշխարհային պատերազմի ժամանակ, երբ երկիրը, մասամբ փոխադարձ հիմունքներով, զենք և ռազմավարական նյութեր էր մատակարարում հակահիտլերյան կոալիցիայի դաշնակիցներին, ներառյալ՝ ԽՍՀՄ-ին: Այն երկրները, որոնք ԱՄՆ-ից օգնություն են ստացել Lend-Lease-ի շրջանակում, կարող են դրա դիմաց վճարել մի քանի տարում:
Ըստ օրինագծի՝ Ուկրաինայի համար Lend-Lease-ի ծրագիրը չի սահմանափակվելու անցյալի որոշ դրույթներով։ Մասնավորապես, չեղյալ է հայտարարվում Lend-Lease-ի տրամադրման հնգամյա սահմանափակումը՝ դրույթը, որը թույլ է տալիս ԱՄՆ-ին ցանկացած պահի հետ կանչել տրամադրվող ռազմական օգնությունը, պահանջը, որ ընդունող կողմը պետք է համաձայնի վճարել ԱՄՆ-ի բոլոր ծախսերը, որոնք կատարվել են պաշտպանական իրերի վարձակալության համար, և դրույթը, որը թույլ է տալիս ԱՄՆ Կոնգրեսին արգելել որոշակի պաշտպանական իրերի փոխանցումը:
