18.05.2026 | 23:42
«Անկախ դիտորդ»-ը պահանջում է ազատ արձակել Արթուր Օսիպյանին և պարզաբանում տալ նրա ձերբակալության հիմքերի վերաբերյալ
ԱՄՆ-ը և նրա դաշնակիցներն Ուկրաինային 10 հակատանկային համակարգ են մատակարարել՝ յուրաքանչյուր ռուսական տանկի համար․ Բլինքեն
Քաղաքականություն
07.04.2022 | 15:52
ԱՄՆ պետքարտուղար Էնթոնի Բլինքենը NBC-ին տված հարցազրույցում հայտարարել է, որ ԱՄՆ-ը և նրա դաշնակիցներն Ուկրաինային արդեն տրամադրել են կամ շուտով կտրամադրեն «10 հակատանկային համակարգ՝ յուրաքանչյուր ռուսական տանկի համար», գրում է BBC-ի ռուսական ծառայությունը։
Բլինքենը նաև ասել է, որ Ուկրաինայում զինված հակամարտությունը կարող է ձգձգվել, սակայն ինքը չի տեսնում «որևէ հնարավոր սցենար», որում Կիևը չի հաղթում։
New York Times-ը, հղում անելով Պենտագոնի պաշտոնյաներին, հայտնել է, որ ԱՄՆ-ում է գտնվում ուկրաինացի զինվորականների խումբը, որը երկար ծրագրված ուսումնական ծրագրի շրջանակում վարժանքների է մասնակցել՝ Switchblade անօդաչու թռչող սարքերի կիրառումը սովորելու համար:
Switchblade մեկանգամյա օգտագործման կամիկաձե անօդաչու սարքերը մշակվել են ԱՄՆ բանակի կողմից Աֆղանստանում մարտերի ժամանակ՝ որպես «թափառող զինամթերք», որն ընդամենը 2,7 կգ քաշ ունի և տեղավորվում է ուսապարկի մեջ, այսինքն՝ կարող է կրել մեկ զինվոր։
Մարտի 15-ին Սպիտակ տունը հայտարարեց, որ Ուկրաինային 100 նման անօդաչու թռչող սարք է մատակարարելու՝ որպես 800 միլիոն դոլար ընդհանուր գումարի օգնության փաթեթի մաս:
