Կարեն Կարապետյանի և ԱՄՆ դեսպան Ռ․ Միլսի հանդիպման մասին կառավարության լրատվականը ապատեղեկատվությո՞ւն էր տարածել

Քիչ առաջ ՀՀ կառավարության լրատվական ծառայությունը տարածեց վարչապետի պաշտոնակատար Կարեն Կարապետյանի եւ ՀՀ-ում ԱՄն դեսպան Ռիչարդ Միլսի հանդիպման մասին հաղորդագրության խմբագրված տարբերակ, որը տրամագծորեն տարբերվում է կառավարության տարածած նախորդ հաղորդագրության բովանդակությունից։ Այն, հիշեցնենք, հանվել էր կառավարության կայքէջից; Նոր հաղորդագրությունում մասնավորապես ասված է․

«Վարչապետի պաշտոնակատար Կարեն Կարապետյանն ընդունել է Հայաստանում ԱՄՆ արտակարգ և լիազոր դեսպան Ռիչարդ Միլսին: Զրուցակիցները քննարկել են Հայաստանի ներքաղաքական իրավիճակին առնչվող մի շարք հարցեր: 

Կարեն Կարապետյանը կարևորել է ներքաղաքական խնդիրների լուծումը երկխոսության, Սահմանադրական ճանապարհով և շնորհակալություն հայտնել ԱՄՆ կառավարությանը՝ այս հարցում արտահայտած դիրքորոշման համար: Վարչապետի պաշտոնակատարը կարևորել է նախագահ Արմեն Սարգսյանի կողմից խորհրդակցությունների անցկացումը խորհրդարանական և արտախորհրդարանական ուժերի ներկայացուցիչների հետ՝ քննարկելու երկրում ստեղծված վիճակն ու դրանից դուրս գալու ուղիները, այդ թվում՝ արտահերթ խորհրդարանական ընտրությունների անցկացման միջոցով:  

Դեսպան Միլսը կրկին անգամ վերահաստատել է ԱՄՆ կառավարության դիրքորոշումը և շեշտել, որ բոլոր գործընթացները պետք է տեղի ունենան Սահմանադրության համաձայն: Նա ավելացրել է, որ քաղաքական իրավիճակի կարգավորման համար երկխոսությունն այլընտրանք չունի»:

   Մինչդեռ  Կառավարության լրատվականի կողմից տարածած նախորդ հաղորդագրությունում նշված էր, թե ԱՄՆ դեսպան Ռիչարդ Միլցը Կարեն Կարապետյանին ասել է․«Ես հասկանում եմ, որ այս ցույցերը, քաղաքացիական անհնազանդության գործողությունները հանդիսանում են օրենքի խախտում, և կառավարությունը պարտավոր է ապահովել հասարակական կարգն ու անվտանգությունը հնարավորինս լավ: Ես վստահ եմ, որ ժողովրդավարության կամ ժողովրդավարության ամրապնդման ճանապարհը նա չէ, որ վարչապետի թեկնածուն ընտրվում է փողոցում՝ ցույցի ժամանակ»: