28.09.2026 | 23:18
Հայաստանի մի շարք հասցեներում էլեկտրաէներգիայի անջատումներ կլինեն
Ինչո՞ւ է ՀՀ կառավարության կայքից հանվել Ռիչարդ Միլզի հետ Կարեն Կարապետյանի հանդիպման մասին հաղորդագրությունը
Քաղաքականություն
25.04.2018 | 19:19
Մոտ կես ժամ առաջ ՀՀ կառավարության պաշտոնական կայքում հրապարակվեց ՀՀ-ում ԱՄՆ դեսպան Ռիչարդ Միլզի հետ ՀՀ վարչապետի ժամանակավոր պաշտոնակատար Կարեն Կարապետյանի հանդիպման մասին հաղորդագրությունը, որը, սակայն, անհասկանալի պատճառներով րոպեներ առաջ հանվեց: Կառավարության պաշտոնական կայքէջից հանվել է նաեւ այդ հանդիպման տեսագրությունը: Թե ինչու է Կառավարության պաշտոնական կայքից հանվել ՀՀ-ում ԱՄՆ դեսպանի հետ հանդիպման մասին հաղորդագրությունը՝ հայտնի չէ, կառավարության լրատվական ծառայությունն առավոտից կաթվածահար վիճակում է եւ ծառայությունից որեւէ տեղեկություն ճշտելու մեր բոլոր փորձերը մնում են անպատասխան: Նկատենք, սակայն, որ Կառավարության տարածած հաղորդագրությունում Ռ. Միլզի անունից արված հայտարարությունները զգալիորեն տարբերվում էին մինչ այդ ԱՄՆ Պետդեպի արած հայտարարությունների ընդհանուր տրամաբանությունից: Մասնավորապես՝ ըստ կայքէջից ջնջված հաղորդագրության՝ դեսպան Միլզն ասել էր. «Ես հասկանում եմ, որ այս ցույցերը, քաղաքացիական անհնազանդության գործողությունները հանդիսանում են օրենքի խախտում, և կառավարությունը պարտավոր է ապահովել հասարակական կարգն ու անվտանգությունը հնարավորինս լավ: Ես վստահ եմ, որ ժողովրդավարության կամ ժողովրդավարության ամրապնդման ճանապարհը նա չէ, որ վարչապետի թեկնածուն ընտրվում է փողոցում՝ ցույցի ժամանակ»:
Մենք կապ հաստատեցինք նաեւ ԱՄՆ դեսպանատան մամուլի քարտուղար Թագուհի Ջահուկյանի հետ, ով նշեց, որ ինքը տեղյակ չէ, թե ինչու է հաղորդագրությունը հանվել կառավարության կայքից, սակայն տեղեկացրեց, որ քիչ անց դեսպանատունը հանդես կգա պաշտոնական հայտարարությամբ:
