Կիպրոսը ԵՄ-ում լոբբինգ է անում Թուրքիային զենքի վաճառքը սահմանափակելու համար

Կիպրոսը ձգտում է սահմանափակել ԵՄ-ի կողմից Թուրքիային զենք վաճառքը։ Այս մասին հայտնում է Cyprus Mail-ը, փոխանցում է «Ահվալ»-ը։

Նշվում է, որ կառավարությունը լոբբինգ է անելու Եվրամիության երկրներում՝ ստիպելու նրանց նվազեցնել զենքի վաճառքը Թուրքիային, և խորհրդարանին խնդրել է աջակցել այդ ջանքերին: Հարցը քննարկվել է Ներկայացուցիչների պալատի արտաքին հարաբերությունների հանձնաժողովում։ Նիստից հետո իշխող կուսակցության պատգամավոր Հարիս Գեոգիադեսն ասել է, որ Անկարայի ագրեսիվ քաղաքականությունն արևելյան Միջերկրականում վտանգ է ներկայացնում ինչպես Կիպրոսի, այնպես էլ Հունաստանի համար:

«Թուրքիան դարձել է զենքի խոշոր արտահանող, ինչպես նաև կարողություն ունի ինքնուրույն զենք արտադրել։ Դա մի երկիր է, որը խաթարում է կայունությունն ու անվտանգությունն ավելի լայն տարածաշրջանում, և առանց որևէ պատրանքի, մենք պետք է ԵՄ անդամ չհանդիսացող երկրների խորհրդարանների հետ մեր շփումների միջոցով դժվարացնենք Թուրքիայի վերածվելը հեգեմոն տերության, որը հիմնված է հիմնականում իր ռազմական հզորության վրա»,- ասել է պատգամավորը։

Չնայած Թուրքիայի ներքին պաշտպանական արդյունաբերության ձեռք բերած քայլերին՝ երկիրը շարունակում է ապավինել սպառազինությունների ներմուծմանը: Ուստի, պատգամավորի պնդմամբ, Կիպրոսի խորհրդարանը պետք է դիվանագիտական նախաձեռնություններով հանդես գա, որոնք ուղղված կլինեն Թուրքիային այդ վաճառքը կանխելուն:

Պաշտպանության նախարար Խարալամբոս Պետրիդեսն էլ ասել է, որ հարցը երկու ասպեկտ ունի. «Առաջինը վերաբերում է Թուրքիա զենքի արտահանմանը և վաճառքին, երկրորդը ներառում է Թուրքիայի տնօրինած զենքի տեսակի մոնիթորինգն ու հետախուզական տվյալները»:

Արտաքին գործերի նախարարության պաշտոնյան իր հերթին նշել է, որ Թուրքիայի՝ Սիրիա ներխուժումից ի վեր ԵՄ-ն, Միացյալ Նահանգները և Կանադան խստացրել են իրենց զենքի արտահանման լիցենզիաները Թուրքիա, որը մտահոգում է Անկարային։

Էմմա Չոբանյան