ԱՄՆ-ը և Թուրքիան համագործակցության ռազմավարական մեխանիզմ են գործարկել

ԱՄՆ-ը և Թուրքիան երկու երկրների համագործակցության ռազմավարական մեխանիզմ են գործարկում։ Այս մասին տեղեկանում ենք ԱՄՆ Պետքարտուղարության կայքում հրապարակված հայտարարությունից։

Մասնավորապես, նշվում է, որ հավատարիմ մնալով նախագահներ Բայդենի և Էրդողանի կողմից 2021 թվականի հոկտեմբերին Հռոմում կայացած հանդիպման ժամանակ ստանձնած պարտավորություններին՝ Միացյալ Նահանգները և Թուրքիան ապրիլի 4-ին Անկարայում գործարկել են ԱՄՆ-Թուրքիա ռազմավարական մեխանիզմը:

«Պետքարտուղարի տեղակալ Վիկտորյա Նուլանդը և ԱԳ փոխնախարար Սեդաթ Օնալն իրենց պատվիրակությունների հետ միասին հանդիպել են Անկարայում՝ քննարկելու փոխադարձ հետաքրքրություն ներկայացնող թեմաները, այդ թվում՝ տնտեսական և պաշտպանական համագործակցությունը, հակաահաբեկչությունը և ընդհանուր տարածաշրջանային ու համաշխարհային հետաքրքրություն ներկայացնող հիմնական ոլորտները: Նրանք վերահաստատել են իրենց համատեղ հավատարմությունը Ուկրաինայի ինքնիշխանությանն ու տարածքային ամբողջականությանը։ Միացյալ Նահանգները ողջունել է պատերազմին վերջ տալու համար բանակցային դիվանագիտական լուծմանը նպաստելու՝ Թուրքիայի ջանքերը»,- ասվում է հայտարարության մեջ։

Նշվում է նաև, որ ԱՄՆ Առևտրի դեպարտամենտի քարտուղարի տեղակալ Մարիսա Լագոն ապրիլի 5-6-ն այցելելու է Անկարա՝ ռազմավարական մեխանիզմի շրջանակում տնտեսական ու առևտրային համագործակցության նպատակներն առաջ տանելու համար։

«ԱՄՆ-ը և Թուրքիան անհամբերությամբ սպասում են Ռազմավարական մեխանիզմի շրջանակում նախարարների մակարդակով հանդիպմանն ավելի ուշ 2022թ․»,- ասվում է հայտարարության մեջ։

Էմմա Չոբանյան