ԱՄՆ օրենսդիրները կոչ են անում Ջո Բայդենին՝ ընդլայնել Ուկրաինա ուղարկվող սպառազինության շրջանակը

ԱՄՆ օրենսդիրների երկկուսակցական խումբը, որի կազմում երեք տասնյակից ավելի ներկայացուցիչներ կան, նախագահ Ջո Բայդենի վարչակազմին հորդորում է ընդլայնել Ուկրաինային մատակարարվող ռազմական օգնությունը՝ օգնելու երկրին ավելի շատ զենքերով պաշտպանվել ՌԴ-ից։ Այս մասին ասվում է նամակում, որը հայտնվել է CNN-ի տրամադրության տակ։

Դեմոկրատական կուսակցության պատգամավորներ Էնդի Քիմն ու Ջեյսոն Քրոուն գլխավորում են ԱՄՆ նախագահ Ջո Բայդենին ուղղված նամակի նախաձեռնությունը, որով կոչ է արվում ԱՄՆ-ին տրամադրել ավելի շատ սպառազինություն, այդ թվում՝ հեռահար «երկիր-օդ» հրթիռներ, կործանիչներ և հականավային հրթիռներ: Օրենսդիրներն ասում են, որ իրենց խնդրանքը հիմնված է ուկրաինացի պաշտոնյաների ցանկությունների ցանկի վրա։

Օրենսդիրների դիմումը ներառում է նաև Stinger հակաօդային և Javelin հակատանկային հրթիռների մատակարարումների ավելացում, ինչպես նաև անօդաչու թռչող սարքեր, որոնք ունեն ավելի մեծ հեռահարություն, որպեսզի Ուկրաինան «ավելի լավ խափանի ռուսական մատակարարման գծերը և հակազդի ռուսական պաշարմանը»:

Բայդենի վարչակազմն իր հերթին ասում է, որ ԱՄՆ-ն և ՆԱՏՕ-ի դաշնակիցները Ուկրաինային աջակցում են պատմական տեմպերով՝ ուղարկելով հարյուր միլիոնավոր դոլարների սպառազինություն պատերազմի մեկնարկից ի վեր։

Օրենսդիրները պնդում են, որ անհրաժեշտ են կործանիչներ։ Ըստ նրանց՝ Ուկրաինան ունի բավականին պատրաստված օդաչուներ, սական անհրաժեշտ են լրացուցիչ ինքնաթիռներ։

Էմմա Չոբանյան