18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
ԱՄՆ-ը կանխատեսում է, որ Ուկրաինայում պատերազմի նոր փուլը կարող է ձգձգվել մի քանի ամիս և ավելի
Քաղաքականություն
05.04.2022 | 13:56
Ռուսաստանը վերանայում է իր ռազմական նպատակները և պատրաստվում պատերազմի նոր փուլին, որը կարող է տևել մի քանի ամիս կամ ավելի երկար: Այս մասին ապրիլի 4-ին կայացած ճեպազրույցում հայտարարել է ԱՄՆ նախագահի ազգային անվտանգության հարցերով խորհրդական Ջեյք Սալիվանը։
Նրա խոսքով՝ Ռուսաստանի Դաշնությունը վերախմբավորում է իր ուժերը, որպեսզի կենտրոնացնի հարձակողական գործողությունները Դոնբասում և Ուկրաինայի հարավում։
«Ամեն ինչ ցույց է տալիս, որ Ռուսաստանը կձգտի շրջափակել և ճնշել ուկրաինական ուժերին Արևելյան Ուկրաինայում։ Ռուսական ուժերն արդեն Կիևից դուրս են գալիս դեպի Բելառուս, քանի որ Ռուսաստանը, հավանաբար, պատրաստվում է տասնյակ հազարավոր գումարտակային մարտավարական խմբեր տեղակայել առաջնագծում՝ Ուկրաինայի արևելքում»,- նշել է Սալիվանը։
ԱՄՆ-ը կանխատեսում է, որ Ռուսաստանը կկենտրոնանա Լուգանսկի և Դոնեցկի շրջաններում ավելի լայն սահմաններ գրավելու փորձերի ուղղությամբ՝ նախկին ռազմական ձախողումները «քողարկելու» համար։ Բացի այդ, սպասվում է, որ Մոսկվան «կընդլայնի իր ուժային նախագծերը» Լուգանսկի և Դոնեցկի շրջաններից դուրս։
«Հարավում մենք ակնկալում ենք, որ ռուս զինվորականները կանեն հնարավոր ամեն ինչ՝ փորձելու պահել Խերսոն քաղաքը, ապահովելով դեպի Ղրիմ ջրի հոսքի վերահսկողությունը և փորձելով շրջափակել Նիկոլաևը, որպեսզի ուկրաինական ուժերը չկարողանան հետ գրավել Խերսոնը: Ռուսաստանը, ամենայն հավանականությամբ, կշարունակի ճնշում գործադրել Խարկովի վրա»,- ասել է Սալիվանը։
Նա հավելել է, որ արևելքում Ռուսաստանի վերսկսած ցամաքային հարձակման ժամանակ, ամենայն հավանականությամբ, կշարունակվեն օդային և հրթիռային հարվածները Ուկրաինայի մնացյալ տարածքների վրա։
«Ռուսաստանի նպատակն է, ի վերջո, հնարավորինս թուլացնել Ուկրաինան։ Այս հակամարտության հաջորդ փուլը կարող է ձգձգվել: Մենք չպետք է պատրանքներ ունենանք, որ Ռուսաստանը կկարգավորի իր մարտավարությունը, որը ներառել է և, հավանաբար, կներառի անիմաստ լկտի հարձակումներ քաղաքացիական օբյեկտների վրա»,- հայտարարել է ԱՄՆ նախագահի խորհրդականը։
Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել է Ուկրաինայում «ապառազմականացման համար հատուկ ռազմական գործողություն սկսելու մասին»: Ի պատասխան՝ Արևմուտքը նոր հակառուսական պատժամիջոցներ է սահմանել։
Տաթև Ֆռանգյան
