Սառը պատերազմին հետևած դարաշրջանն ավարտված է․ Բլինքեն

ԱՄՆ պետքարտուղար Էնթոնի Բլինքենը «գիծ է քաշել» միջազգային հարաբերությունների ջերմացման տակ, որը հաջորդել է Բեռլինի պատի և Խորհրդային Միության փլուզմանը՝ ասելով, որ «այդ դարաշրջանն ավարտվել է», գրում է VOA-ն։

«Մենք կրկին հայտնվել ենք պատմության հորձանուտում»,- ասել է Բլինքենը ԱՄՆ Պետքարտուղարության շենքում գերատեսչության 61-րդ ղեկավար Ջեյմս Բեյքերի կիսանդրու տեղադրման հանդիսավոր արարողության ժամանակ:

Բեյքերը Պետքարտուղարությունը ղեկավարել է 1989-1992 թվականներին: Նա վերակառուցման ժամանակաշրջանում սերտ անձնական հարաբերություններ էր պահպանում ԽՍՀՄ արտգործնախարար Էդուարդ Շևարդնաձեի հետ, համարվում է սպառազինությունների վերահսկման բազմաթիվ համաձայնագրերի ճարտարապետը, որոնք կնքվել են այդ ժամանակաշրջանում: Սակայն, ինչպես նշել է Բլինքենը, համագործակցության այդ դարաշրջանն անցյալում է մնացել։

«Ավելի վստահ Չինաստանը մարտահրավեր է նետում կանոնների վրա հիմնված աշխարհակարգին, որը երկար ժամանակ հիմք է հանդիսացել ամերիկացիների և ամբողջ աշխարհի մարդկանց անվտանգության ու բարգավաճման համար: Այն դարաշրջանը, որը նշանավորեց Սառը պատերազմի ավարտից հետո ընկած ժամանակահատվածը, ավարտվել է»,- պնդում է Բլինքենը:

Ամերիկացի պաշտոնյան ձեռնպահ է մնացել բնութագրել ներկա ժամանակաշրջանը, որը, նրա կարծիքով, փոխարինել է Խորհրդային Միության փլուզմանը հետևած ջերմացմանը: Նա, սակայն, ուշադրություն է հրավիրել Ուկրաինայի շուրջ տեղի ունեցող իրադարձությունների վրա։

«Ռուսաստանը ներխուժել է հարևան երկիր։ Վերադարձել է երկրի ներսում գրեթե տոտալիտար ռեպրեսիաներին։ Այն նույնիսկ սպառնում է միջուկային զենք կիրառել»,- ասել է Բլինքենը:

Տաթև Ֆռանգյան